Byltyr 800-ge jýyq jambyldyq qaterli isikten kóz jumǵan
TARAZ. QazAqparat – Jambyl oblysynda obyr aýrýynyń úles salmaǵy boıynsha sút bezi qaterli isigi birinshi orynǵa shyqqan. Bul týraly ÓKQ alańynda Jambyl oblystyq kópbeıindi aýrýhanasynyń bas dárigeri Abaı Nurjanov málim etti, dep habarlaıdy QazAqparat tilshisi.
Spıkerdiń aıtýynsha, sút bezi qaterli isigi boıynsha kórsetkish 12,2 paıyzdy qurap otyr. Odan keıingi orynda ókpe qaterli isigi (10,0 paıyz), asqazan qaterli isigi (8,5%), teri qaterli isigi (7,9%), jatyr moıny qaterli isigi (5,2%), toq ishek, tik ishek qaterli isigi (4,7%) tur.
Brıfıng barysynda bas dáriger aýrýdyń ótken jylǵy kórsetkishterine toqtaldy. Byltyr oblysta obyr aýrýymen tirkeýde turǵandar sany 7652-ge jetken. Al bul kórsetkish 2019 jyly 7360 bolǵan.
«2020 jyly oblys boıynsha qaterli isik alǵashqy ret 1414 adamnan anyqtalǵan. Ólim kórsetkishine kelsek oblys boıynsha byltyr 768 naýqas qaıtys bolyp, ólim kórsetkishi 100,0 myń adamǵa shaqqanda 67,4 quraǵan. Ólim kórsetkishiniń kóterilgeni baıqalady, onyń sebebi esepte turǵan adamdardyń kóbeıýine baılanysty dep esepteımiz», - dedi Abaı Nurjanov.
Aıta keteıik, ótken jyly óńirde qaterli isikke alǵash shaldyqqan 1414 adamnyń 58,2 paıyzy syrqattyń I jáne II satysynda anyqtaldy. Bul – osynsha naýqastyń qajetti emdi ýaqtyly alsa, jazylyp ketý múmkindigi joǵary degen sóz. Dárigerler syrqattyń aldyn alý úshin turaqty túrde tekserilip turýǵa keńes berdi.
