Byltyr 8 myńnan astam atyraýlyq ózge óńirlerge emdelýge barǵan
Bul týraly oblys ákimi Serik Shápkenovtiń tóraǵalyǵymen densaýlyq saqtaý basqarmasynyń alqa otyrysynda málim boldy.
Oblystyq densaýlyq saqtaý basqarmasynyń basshysy Ashan Baıdýalıevtiń málimetinshe, ótken jyly salaǵa 60-qa jýyq maman kelgen. Alaıda, kadr tapshylyǵy áli de bar.
«Atyraý oblysyna anestızıolog-reanımatolog, jalpy praktıka dárigeri, akýsher-gınekolog, pýlmonolog men ınfektsıonıstter qajet. Kadr tapshylyǵyn tómendetý úshin bir jolǵy ústemaqyny kóbeıtip, qyzmettik pátermen qamtý máselesin sheshý kerek. Byltyr 846 dáriger, onyń ishinde 104 maman Izraıl men Germanııada biliktiligin arttyrý úshin jergilikti bıýdjetten 550 mln teńge bólindi. Qazir memlekettik medıtsınalyq mekemelerdi arnaıy tehnıkamen jabdyqtaý deńgeıi 92,3%-dy quraıdy», -deıdi Ashan Baıdýalıev.
Basqarma basshysynyń orynbasary Qaısar Abdalıevtiń málimetinshe, byltyr 8 068 atyraýlyq ózge óńirlerde em alǵan. Onyń ishinde 5 924 patsıent josparly túrde emdelgen. Jalpy emdelý shyǵyny – 5,1 mlrd teńge.
«Atyraý oblysynda 144 medıtsınalyq qyzmettiń tek 30 túri kórsetiledi. Byltyr 506 operatsııa jasaldy. Alaıda, 407 patsıent ota jasatý úshin Astana, Almaty, Aqtóbe jáne ózge oblystarǵa barǵan. Bıylǵy ekinshi jartyjyldyqta Atyraý oblysynda otolarıngologııa, ýrologııa, neırohırýrgııa, endoskopııalyq,onkologııalyq boıynsha jańa operatsııa túrlerin engizý josparlanyp otyr», -dep málim etti Qaısar Abdalıev.
Oblys ákimi Serik Shápkenovtiń pikirinshe, dárigerlerdiń biliktiligin jetildirip, turǵyndardyń jergilikti mamandarǵa senimin arttyrý úshin jumys isteý qajet.
«Men oblystaǵy dárigerlerdiń kásibıligine kúmán keltirmeımin. Máselen, kardıohırýrgtar júrekke otany jasaı alady. Atyraýda medıtsınalyq qural-jabdyqpen qamtý kórsetkishi respýblıkalyq deńgeıden 9%-ǵa joǵary. Endeshe operatsııalardy Atyraýda jasaýǵa ne kedergi? Aýdan turǵyndarynyń da, jeke qabyldaýyma kelgenderdiń de saýalynyń basym kópshiligi densaýlyq saqtaý salasyna qatysty qoıylady. Emdeý mekemelerindegi qural-jabdyqtardy turǵyndar densaýlyǵyn jaqsartýǵa tıimdi paıdalanyp, patsıentterge janashyrlyqpen jumys isteý qajet», -dedi Serik Shápkenov.
Budan buryn Atyraýda orta mekteptiń dırektorynan týberkýlez derti anyqtalǵanyn jazǵan edik.