Byltyr 7 JOO jabylyp, 33 uıymnan 109 lıtsenzııa qaıtarylǵan

NUR-SULTAN. QazAqparat – 2020 jyly Bilim jáne ǵylym mınıstrligi eńbek naryǵynyń talaptaryna sáıkes kelmeıtin 7 joǵary oqý ornyn jaýyp, 33 uıymnan suranysy az baǵyttar boıynsha 109 lıtsenzııany qaıtaryp alǵan, dep habarlaıdy QazAqparat tilshisi.

Bul týraly Premer-Mınıstrdiń orynbasary Eraly Toǵjanov Májilis ókilderiniń depýtattyq saýalyna bergen jaýabynda aıtty.

«Akademııalyq derbestikke baılanysty joǵary jáne joǵary oqý ornynan keıingi bilim berý uıymdary jumys berýshilermen birlesip, eńbek naryǵynyń qajettiligin eskere otyryp, bilim berý baǵdarlamalaryn derbes ázirleıdi. Bilim berý baǵdarlamalaryn ázirleý kezinde ıkemdi, kásibı jáne kásipkerlik daǵdylar men tsıfrlandyrýdy damytýǵa basty nazar aýdarylady. Qazirgi zamanǵy trendterdi jáne jumys berýshilerdiń talaptaryn eskere otyryp, atalmysh uıymdar bilim berý baǵdarlamalaryn jańartyp otyrady», - deıdi vıtse-Premer.

Sondaı-aq, Eraly Toǵjanov qazir tizilimge 9011 baǵdarlama engizilgenin, onyń ishinde 268-i ınnovatsııalyq baǵdarlama ekenin atady.

«Jumys berýshilerdi akademııalyq protseske barynsha tartý úshin joǵary oqý oryndary, bıznes ókilderi men sheteldik sarapshylar arasynda dıalog alańdary men jergilikti konsortsıýmdar qurylýda. Bilim berý baǵdarlamalarynyń mazmunyna akademııalyq jazý jáne zertteý ádisteri boıynsha pánder engizildi. Mınıstrlik eńbek naryǵynyń talaptaryna sáıkes kelmeıtin JJOKBU-lardy ońtaılandyrý jumysyn jalǵastyrýda. 2020 jyly 7 JJOKBU jabyldy. 33 JJOKBU kadrlardy daıarlaýdyń beıindi emes baǵyttary boıynsha 109 lıtsenzııany qaıtardy», - delingen depýtattyq saýalǵa joldanǵan jaýapta.