Byltyr 273 sábı skrınıngtiń arqasynda soqyrlyqtan aman qalǵan
Bul týraly QR Densaýlyq saqtaý mınıstrligi Ana men bala densaýlyǵyn qorǵaý departamenti dırektorynyń orynbasary Oljas Iskakov ortalyq kommýnıkatsııalar qyzmetinde ótken brıfıngide málim etti.
«Densaýlyq saqtaý mınıstrligi 2021 jyly balalardy skrınıngten ótkizý týraly buıryqty jańartty. Ol jańa buıryqqa qosymshalar engizildi. Sonyń arqasynda balalarǵa 5 túrli skrınıng júrgiziledi. Sonyń biri – shala týǵan balalarda kezdesetin soqyrlyqtyń aldyn alý úshin júrgiziledi.
Búgingi tańda elimizde jylyna 400 myńnan astam bala týady. Sonyń 20 myńǵa jýyǵy shala týady. Osy 20 myńnyń ishinde salmaǵy 500-900 gramm bolatyn nárestelerge skrınıng júrgize bastadyq. 2021 jyly skrınıngten ótken 6500 balanyń 273-ine sol mezette ota jasap, soqyrlyqtyń aldyn aldyq», - dedi departament ókili.
Onyń aıtýynsha, bul problema áli de ózekti.
«Qazaqstan halqyna» qorymen birge 14 óńirden 30 medıtsına uıymyna qondyrǵyǵa qosymsha suranys aldyq. Bul suranys aıasynda bizde búkil medıtsına uıymdary skrınıngke qajetti qondyrǵymen 100 paıyz jabdyqtalady. Qosymsha perınataldyq ortalyqtardyń ashylýy, ekinshi, úshinshi deńgeıli uıymdardyń kóbeıýi esebinen búkil uıymdardy qural-jabdyqpen jabdyqtap, árbir shala týǵan balanyń skrınınten ótýin qamtamasyz etemiz. Mınıstrlik osy qondyrǵymen jumys isteıtin mamandardy oqytý jumysyn qolǵa aldy», - dedi Oljas Iskakov.
Buǵan deıin jazǵanymyzdaı, Qazaqstanda perınataldyq jáne neonataldyq skrınıngter aıasy keńeıtildi.
