Byltyr 2 trln teńgege 160-qa jýyq ınvestıtsııalyq joba iske asyryldy

ASTANA. QazAqparat – 2022 jyly elimizde 160-qa jýyq ınvestıtsııalyq joba iske qosyldy. Bul týraly Indýstrııa jáne ınfraqurylymdyq damý mınıstri Marat Qarabaev málim etti, dep habarlaıdy QazAqparat tilshisi.

«2022 jyldyń qorytyndysy boıynsha óńdirýshi ónerkásipte oń úrdis baıqalyp, jıyntyq kórsetkish 103,4%-dy qurady. Onyń qatarynda mashına jasaý salasy avtokólik quraldary, treılerler men jartylaı tirkemeler, elektr jabdyqtary, mashınalar men ózgede jabdyqtardy shyǵarý bar. Sondaı-aq, basqa kishi salalar esebinen 9,4% deńgeıinde turaqty ósimdi kórsetip otyr. Sol sııaqty tústi metallýrgııada naqty kólem ındeksi 105,5% qurady», - dedi Marat Qarabaev Úkimet otyrysynda.

Mınıstrdiń aıtýynsha, ótken jyly elimizde tazartylǵan mys, quıma altyn, tazartylǵan altyn men kúmisti óndirý kólemi artqan.

«Hımııa ónerkásibinde óndiris kólemi 10,2% ósti. Kómirtegi dıoksıdi, hlor, tuz qyshqyly, kúkirt qyshqyly, suıyq ammıak óndirisiniń kólemi ulǵaıdy. Jeńil ónerkásipte óndiris kólemi toqyma buıymdary, kıim jáne bylǵary ónimder óndirisiniń ósýi esebinen 6%-ǵa artty. Qurylys materıaldary óndirisiniń kólemi gıps, qurylys eritindisi jáne kirpishter óndirisiniń ósýi esebinen 1,3% ósti. 2022 jyldyń qorytyndysy boıynsha jalpy somasy 2 trln teńgege 160-qa jýyq ınvestıtsııalyq joba paıdalanýǵa berildi. Jobalar eksporttyq áleýetti ulǵaıta otyryp, óndeýshi ónerkásiptik óndiris kólemin odan ári arttyrýǵa múmkindik beredi», - deıdi ol.