«Bylǵary dop - 2010» jarysynyń jeńimpazdary Qazaqstan - Túrkııa oıynyn tamashalaýǵa múmkindik aldy
ASTANA. Qyrkúıektiń 3-i. QazAqparat /Arman Asqarov/ - Qazaqstannyń Fýtbol federatsııasynyń arnaıy shaqyrýymen «Bylǵary dop - 2010» jarysynyń jeńimpazdary - Temirtaý qalasynyń №17 orta mektebeniń 18 oqýshysy elordaǵa kelip, búgin «Astana - Arena» stadıonynda ótetin «Eýro - 2012» chempıonatynyń irikteý týrnıri aıasyndaǵy Qazaqstan - Túrkııa oıynyn tamashalaýǵa múmkindik aldy,
dep habarlaıdy QazAqparat.
Osyǵan oraı búgin «Astana - Arena» stadıonynda arnaıy baspasóz-máslıhaty ótip, Qazaqstannyń Fýtbol federatsııasynyń ókilderi «Bylǵary dop - 2010» jarysynyń jeńimpazdarymen kezdesti. Іs-shara barysynda federatsııanyń vıtse-prezıdenti, belgili fýtbolshy Seılda Baıshaqov jas sportshylardyń bastamalaryna sát sapar tilep, olardyń otandyq fýtboldy jańǵyrtý jolynda tek joǵary jetistikterge ǵana jete berýlerine tilektestik bildirdi.
Aıta keteıik, bıylǵy «Bylǵary dop - 2010» fýtbol jarysyna elimizdiń 5 myń mektebinen 500 myńǵa jýyq oqýshy qatysty. Jarystyń aqtyq syndarynda Ońtústik Qazaqstan oblysy, Almaty jáne Temirtaý qalalarynyń komandalary jeńiske jetti. Olardyń biri - Temirtaý qalasynyń №17 orta mektebeniń 18 oqýshysy búgin «Astana - Arena» stadıonynda ótetin «Eýro - 2012» chempıonatynyń irikteý týrnıri aıasyndaǵy Qazaqstan - Túrkııa oıynyn tamashalaýǵa múmkindik aldy. «Temirtaý bizdiń prezıdentimiz Nursultan Nazarbaevtyń eńbek joly bastalǵan qalasy bolǵannan keıin, sondaı-aq «Bylǵary dop» jarysynyń bes jyldyq tarıhynda Temirtaý qalasynyń jas fýtbolshylary jeńiske jetip jatqannan keıin biz olardy búgingi Qazaqstan - Túrkııa oıynyn tamashalaýǵa shaqyryp otyrmyz», - dedi óz sózinde «Koka-kola» kompanııasynyń Ortalyq Azııadaǵy menedjeri Arystanbek Nurmahanov.
