Buzaqylyq jasaǵan Petropavl turǵyny 500 saǵattyq qoǵamdyq jumysqa jegildi
PETROPAVL. QazAqparat – Soltústik Qazaqstan oblysynda búginde 33 adam probatsııa qyzmetiniń esebinde tur. Solardyń biri jazasyn 500 saǵat qoǵamdyq jumys atqaryp ótemek, dep habarlaıdy QazAqparat tilshisi.
SQO boıynsha Qylmystyq atqarý júıesi departamenti baspasóz qyzmetiniń málimetinshe, óńirdiń probatsııa qyzmetiniń esebi boıynsha 104 adam qoǵamdyq jumysqa tartylǵan. Sottalǵandardyń 71-i jazasyn ótedi. Qoǵamdyq jumystarǵa eń kóp 1200 saǵat, al eń az 20 saǵatqa sottalýy múmkin.
«Jazanyń bul túri teris qylyqtar men onsha aýyr emes jáne aýyrlyǵy ortasha qylmystar úshin taǵaıyndalady. Sottalǵandar jazany oryndaýdan bas tartqan nemese probatsııa qyzmetiniń baqylaýynan jasyrynǵan faktiler bar, mundaı jaǵdaılarda jaza neǵurlym qatań jazaǵa aýystyrylýy múmkin. Osylaısha jyl basynan beri 6 adamnyń jazasy qatańdatyldy. Bireýi bas bostandyǵynan aıyryldy, ekeýi qamaqqa alyndy, taǵy úsheýiniń bas bostandyǵy shekteldi. Qoǵamdyq jumystardy oryndaýdan merziminen buryn bosatý zańda qarastyrylmaǵan», - deıdi SQO boıynsha QAJD bastyǵy Rýstan Ahmetjanov.
Qoǵamdyq jumystardy sottalǵanǵa turatyn orny boıynsha jergilikti atqarýshy organdar beredi. Jyl mezgiline baılanysty qalany abattandyrýǵa qatysady, gúlzarlardy, saıabaqtardy, kóshelerdi jınaıdy, qalany kógaldandyrýmen aınalysady. Qys mezgilinde negizinen qar tazalaý jumystaryna jegiledi.
«Tótenshe jaǵdaı kezinde sottalǵandar erikti túrde avtobýs aıaldamalary men turǵyn úıdiń kireberisterine dezınfektsııa júrgizdi. Olar óz jazasyn ótep qana qoımaı, qoǵamǵa paıdaly is istedi», - deıdi Rýstan Ahmetjanov.
Petropavl qalalyq probatsııa qyzmeti bóliminiń esebinde turǵan osyndaı sottalǵandardyń biri «Buzaqylyq» baby boıynsha 500 saǵat qoǵamdyq jumys túrinde jazasyn ótep jatyr. 2019 jyldyń jazynda ol oblys ortalyǵyndaǵy meıramhanalardyń birinen mas bolyp shyǵyp, ótip bara jatqan adamdy jeńil jaraqattaǵan. 20 jastaǵy jigit bir jyldan artyq jazasyn ótep jatyr. Jalpy Petropavl qalasy boıynsha qoǵamdyq jumystarǵa tartylǵandardyń sany - úsheý.
