Buzaqy bir túnde eki ǵıbadathananyń áınegin syndyrdy
ALMATY. QazAqparat - Almatyda eki ǵıbadathananyń terezelerin syndyrǵan buzaqy ustaldy, dep habarlaıdy QazAqparat tilshisi.
Oqıǵa keshe túnde bolǵan. 33 jastaǵy er adam aldymen, 28 panfılovshylar saıabaǵyndaǵy Voznesen kafedraldy soborynyń terezesine tas laqtyryp, áınegin syndyryp ketse, jarty saǵattan soń Alataý aýylyndaǵy taǵy bir shirkeýdiń terezesin shaqqan.
«Ol 30 mınýttan soń Alataý aýylynda ornalasqan Petr men Pavl hramynyń terezesin syndyrdy. L. Ivanov buryn shirkeý qyzmetkerlerimen sózge kelip qalǵandyqtan, osylaı kek alýǵa tyrysqan. Tintý kezinde Ivanovtan birneshe iri tas alyndy. Ol óz kinásin moıyndady», - dedi qalalyq ІІD resmı ókili Saltanat Ázirbek.
Buzaqylyq deregi QR QK 293-babynyń 1-bóligi boıynsha sotqa deıingi tergeý reestrine tirkeldi.
