Buıyrsa chempıondyq beldikti ákelemiz: Aıdos Erbosynuly aýrýhanadan shyqty

ASTANA. QazAqparat – Sońǵy jekpe-jeginde aýyr jaraqat alǵan kásipqoı boksshy Aıdos Erbosynuly aýrýhanadan shyqty, dep habarlaıdy QazAqparat tilshisi.

VKontakte áleýmettik jelisindegi «Qazaqstannyń kásipqoı boksy» paraqshasynda sportshynyń aýrýhanadan shyqqannan keıin jazǵan alǵashqy vıdeoúndeýi jarııalandy.

«Maǵan jankúıer bolǵan jandardyń bárine Alla razy bolsyn. Aman-saýmyz, aýrýhanadan emdelip shyqtyq. Aınalysyp júrgen kásibimiz – boks – naǵyz erlerdiń sporty bolǵandyqtan, mundaı jaǵdaılar bolyp turady. Biz ǵana emes, áıgili Pakıaolardyń ózi aýrýhanaǵa talaı ret túsken, myqty bolyp oralǵan. Biz de, ınshalla, myqty bolyp oralamyz. Alla buıyrsa, áli talaı jeńisterge jetemiz, chempıondyq beldikti alyp kelemiz», - dedi Aıdos Erbosynuly.

Eske salsaq, 6 qarasha kúni AQSh-ta qazaqstandyq boksshy Aıdos Erbosynuly (16-0, 11 KO) men kýbalyq Davıd Morrel (7-0, 6 KO) arasynda WBA nusqasy boıynsha sýper orta salmaqtaǵy «turaqty» álem chempıony ataǵy úshin jekpe-jek ótip, otandasymyz nokaýtpen jeńildi. Aıqastan soń boksshymyz shuǵyl túrde aýrýhanaǵa jetkizildi. Ol komaǵa tústi.

Boksshyǵa jankúıerlermen birge Qazaqstan Prezıdenti de qoldaý bildirdi.

Suleimen Promotions kompanııasy buǵan deıin Amerıkaǵa Aıdostyń jubaıy ushyp kelgenin, boksshy taıaý ýaqytta aýrýhanadan shyǵarylýy yqtımal ekenin málimdegen edi.

Vıdeodan alynǵan kadr