Búıregin 9 mln teńgege satpaq bolǵan atyraýlyq jazasyn bostandyqta júrip óteıdi

AQTÓBE. KAZINFORM – Atyraý qalasynyń 27 jastaǵy turǵyny búıregin satpaq bolǵany úshin sottaldy. Ol jazasyn bostandyqta júrip óteıdi. 

№2 Aqtóbe qalalyq sotynda Atyraý oblysynyń týmasy Erbolat Orynbasarovqa qatysty istiń úkimi shyqty.

- Erbolat Orynbasarov Qylmystyq kodekstiń 24-baby 3 bóligi, 116 babynyń 1 bóligimen kózdelgen qylmysty jasaǵany úshin kináli dep tanylsyn. Oǵan 1 jyl merzimge bas bostandyǵynan aıyrý jazasy taǵaıyndalsyn. Qylmystyq kodekstiń 63 babyna saı taǵaıyndalǵan jaza shartty dep sanalsyn, - dedi sýdıa Aqmaral Alıeva.

Sonymen birge probatsııalyq baqylaý aıaqtalǵansha turǵylyqty jerin ózgertpeýi tıis. Al eger ózgerte qalsa, probatsııa qyzmetine habarlaıdy. Jyl ishinde oıyn-saýyq oryndaryna, meıramhanalarǵa, dámhanalarǵa bara almaıdy.

Eske salsaq, Atyraý oblysynyń 27 jastaǵy turǵyny bir búıregin satý úshin áleýmettik jeli arqyly habarlama qaldyrady. Osy habarlamany kórgen aqtóbelik polıtsııaǵa habarlap, aldyn ala kelisim jasaıdy. Sottalýshy óz búıgegin 9 mln teńgege baǵalady. Ol 5 mln teńge alyp jatqan jerinen ustalyp, sot aldynda jaýap berdi.

Sottalýshynyń kámeletke tolmaǵan balalary bar. Úkim kezinde bul jazany jeńildetetin mán-jaı retinde eskerildi.