Búıregin 15 mln teńgege satpaq bolǵan qaraǵandylyq raqymshylyqqa ilikti

AQTÓBE. KAZINFORM – Aqtóbe qalalyq sotynyń sýdıasy 27 jastaǵy qaraǵandylyqqa zań aıasynda raqymshylyq jasady. Búıregin 15 mln teńgege satpaq bolyp, aqshanyń teń jartysyn alyp jatqanda ustalǵan sottalýshy sot zalynan bosap shyqty. 

Oqıǵa bıyl sáýir aıynda boldy. Qaraǵandy oblysy Nura aýdanynyń 27 jastaǵy turǵyny áleýmettik jeli arqyly búırek satatynyn jazyp, habarlama qaldyrady. Arada birneshe kún ótkende Aqtóbe qalasynan habarlasyp, kelisedi. Keıin qaraǵandylyq medıtsınalyq tekserýden ótýge kelisip, jolǵa shyǵady. Aqtóbege kelgen soń tapsyrys berýshi usynǵan páterge ornalasyp, kelisim boıynsha tekserýden ótedi. Sóıtip aqyrǵy kelisimde, 7,5 mln teńge aqsha alyp jatqan kezde ustalyp, tergeý júredi. Oǵan Qylmystyq kodekstiń 24-babynyń 3-bóligi, 116-babynyń 1-bóligimen aıyp taǵyldy. Alaıda búgin ol raqymshylyq jasaý týraly ótinish hat túsirdi.

— Qylmystyq kodekstiń 24-baby 3-bóligi, 116-baby 1-bóligimen kózdelgen qylmystyq quqyqbuzýshylyqty jasady dep aıyptalǵan sottalýshy Qylmystyq kodekstiń 78-baby 2-bóligi negizinde Konstıtýtsııanyń 30 jyldyǵyna baılanysty raqymshylyq jasaý týraly aktisine baılanysty qylmystyq jaýaptylyqtan bosatylsyn. Qylmystyq is júrgizý qylmystyq-protsestik kodekstiń 35-baby 1-bóligi 3-tarmaǵy negizinde toqtatylsyn. Kúzetpen ustaý týraly bultartpaý sharasy joıylsyn, — dedi № 2 Aqtóbe qalalyq sotynyń sýdıasy Aıan Kýsaev.

Eske salsaq, bıyl qańtarda Atyraý qalasynyń 27 jastaǵy turǵyny búıregin satpaq bolǵany úshin sottaldy. Ol jazasyn bostandyqta júrip óteıdi.