Búıregin aýystyrǵan Jámıla Baıserikova aýrýhanadan shyqty

Dárigerler boıjetkenniń densaýlyǵy jaqsy dep baǵalap otyr.

Jámılany shyǵaryp alýǵa donor jigit Abzal, Almatydaǵy «Qaıyrymdy jandar» eriktiler toby keldi.

Jámıla qan qysymynyń únemi joǵary bolýynan qulaǵy estimeı, júre almaı qalǵan edi.

Qazir boıjetken aýrýhanadan óz aıaǵymen shyǵyp ketti.


«Búırek aýystyrý - óte kúrdeli operatsııalardyń biri. Dál Jámılanyń jaǵdaıyna kelsek, bul patsıenttiń gemodıalızden qalǵan birqatar asqynýlary bolǵan. Jámılanyń ókpesinde sary sý, perıkardıt, qanazdyq bolǵan. Qan qysymy óte joǵary, júre almaı qalǵan, tábeti bolmaǵan, qulaqtaǵy shýdan estý qabileti nasharlap ketken. Soǵan qaramastyn ota sátti ótti. Bul asqynýlardyń bári qazir joq. Jámıla endi gemodıalız apparatyna jatpaıdy, qysym túsiretin dári ishpeıdi, qan kórsetkishteri jaqsara tústi. Qulaǵy estı bastady. Endi Jámılany oblystyq dárigerlerge tapsyryp jatyrmyz. Bizdiń transplantologııa salasynyń damyǵanynyń bir kórinisi - búırek almastyrǵan naýqasty qashyqtaǵy dárigerler de baqylaı alady. Ári memleket qajetti dári-dármekpen tegin qamtıdy», - dedi A.Syzǵanov atyndaǵy ulttyq ǵylymı hırýrgııalyq ortalyqtyń baýyr transplantatsııasy jáne ýrologııa bóliminiń meńgerýshisi Ravıl Ibragımov.

Jámıla Baıserikova endi Shymkentte dárigerlerdiń baqylaýynda bolmaq.

Anasy men qyzyn olardyń týǵan balasyndaı bolyp ketken Abzal Ádilov Shymkentke deıin jetkizip salmaq.

«Birinshi alla ekinshi qaıyrymdy jandardyń kómegi ǵoı. Kómektesip jatqan barsha halyqqa rahmetimdi aıtam. Búginge deıin habarlasyp turǵan adamdar bar. Sonyń ózi úlken kúsh. Áli de qaýip bar. Apta saıyn analız ótkizýimiz kerek eken. Bergen dárilerdi ýaqytynda úzbeı ishý kerek. Ary qaraı ómirin bersin dep jatyrmyn perzentimniń. Tańnan beri daıyndalyp júr meniń qulynym. Buryn 2 balam bar edi. Endi meniń 3 balam bar», - dedi anasy Qurmangúl Qulmyrzaeva.

«Abzalǵa, maǵan kómektesken halyqqa kóp rahmet», - dedi Jámıla.

Bul oqıǵany alǵash ret OQO jýrnalısteri kótergen bolatyn.

25 jastaǵy Jámılanyń 2014 jyly qos búıregi isten shyǵyp, otbasy qazaqstandyqtardan kómek suraǵan edi. 2,5 jyldan beri gemodıalız apparatyna tańylyp kelgen boıjetkenge oraldyq jigit Abzal Ádilov búıregin tegin berdi.