Buırataýdyń kerbez arqarlary fototuzaqqa túsip qaldy
ASTANA. KAZINFORM — Buırataý memlekettik ulttyq tabıǵı parkiniń aýmaǵynda fototuzaqqa arqarlar tústi.
Orman ishimen erkin júrgen janýarlar tabıǵı mekeninde anyq tirkeldi. Kadrlardyń birinde arqardyń aýzynda shóp shaınap turǵan sáti de kórinedi. Bul – tabıǵattyń óz yrǵaǵymen jalǵasyp jatqan tirshiligin dál beıneleıtin erekshe kórinis.
Arqar – qazaq dalasynyń aıbyndy ári kórkem janýarlarynyń biri. Olar qyraǵy minezimen, saq qımylymen jáne tabıǵı sulýlyǵymen erekshelenedi. Sondyqtan mundaı sátterdiń fototuzaqqa túsýi árdaıym qyzyǵýshylyq týdyrady.
Osyndaı kadrlar jabaıy janýarlardyń tirshiligin baqylaýǵa, olardyń meken etý ortasyn zertteýge jáne tabıǵı aýmaqtardyń tynysyn tereńirek tanýǵa múmkindik beredi.
Buırataýdyń tynysh ormanynda da tirshilik qyz-qyz qaınap jatyr. Al fototuzaqtar sol kózge kóp túse bermeıtin álemniń bir sátin bizge jaqyndata túsedi.
Aıta keteıik, Marqakól memlekettik tabıǵı qoryǵynda fototuzaq maraldardy tabıǵı mekeninde tirkedi.
