Býxgalter salyq komıtetiniń mádenıetsizdigi úshin Teńgebaevqa aryzdandy

ASTANA. QazAqparat - Búgin Qarjy mınıstrligi Memlekettik kirister komıtetiniń tóraǵasy Ardaq Teńgebaevtyń tóraǵalyǵymen ótken jıyn barysynda jeke fırmanyń býxgalteri salyqshylardyń mádenıetsizdigine aryzdandy, dep habarlaıdy QazAqparat tilshisi.

«Men búgin ǵana Astanadaǵy Almaty aýdandyq salyq komıtetinde boldym. Ol jerde adammen sóılesý mádenıeti syn kótermeıdi. Átteń, beınekameralar joq. Áıtpese, bárin kózin baqyraıtyp turyp kórsetip beretin edim. Iá, qyzmet kórsetý kezinde bári durys, ol jaǵynan eskertý joq. Al, endi ınspektorlar men bastyǵyna jaqyndaı qalsań, qulaǵyn sarsylyp ketedi. Adam sııaqty sóılese almaıdy. Zań boıynsha bir nárseni dáleldeımin deseń, aýyz ashtyrmaıdy. Jańa ǵana sol jaqtan keldim. 407 kabınette otyratyn bólim bastyǵymen urysyp shyqtym. Ózi dóreki sóıleıdi. Bazarda júrgen joqsyz ǵoı, men túski asqa kettim dep qoıady. Bárin uıaly telefonǵa jazyp alý kerek edi. Onyń aıtqan sózderinen qan qysymym kóterilip ketti», - deıdi esepshi Aınur Seıilxanova.

Memlekettik kirister komıtetiniń basshysy Ardaq Teńgebaev tıisti sharalardy qolǵa alýǵa tapsyrma berdi.

Aıta keteıik, komıtette ótken búgingi jıynda Memlekettik kirister organdarynyń jumys sapasy qaraldy. Osyǵan oraı, «Sandj» zertteý ortalyǵy arnaıy saýalnama ótkizdi. Oǵan sáıkes, ótken jyly salyq, keden jáne ekonomıkalyq tergeý qyzmetterine degen xalyqtyń senimi 60-80 paıyzdy qurady.