BUUDB Abaı men Ulytaý oblystarynda qaldyqtardy basqarý júıesin jetildirý jobasyn iske asyrdy
ASTANA. BUU Damý baǵdarlamasy (BUUDB) Qazaqstan Respýblıkasy Ulttyq ekonomıka mınıstrliginiń qoldaýymen Abaı jáne Ulytaý oblystarynda qaldyqtardy basqarý júıesin jetildirýge baǵyttalǵan jobany júzege asyrdy. Bul týraly Qazaqstandaǵy BUU Damý baǵdarlamasy Turaqty ókiliniń orynbasary Sýhrob Hodjımatov Astanada ótip jatqan «Jasyl energııa jáne qaldyqtardy qaıta óńdeý» (GEWR’26) X Eýrazııalyq bıznes-forýmynda aıtty.
Onyń aıtýynsha, «Turaqty damý: jańadan qurylǵan oblystardaǵy óńirlik teńgerimsizdikti eńserý» jobasy osy eki óńirdiń turaqty damýyna serpin berýge baǵyttalǵan.
— Jobanyń negizgi baǵyttarynyń biri — qatty turmystyq qaldyqtardy basqarý júıesin jetildirý. Osy baǵytta qoldanystaǵy júıege taldaý jasalyp, Abaı men Ulytaý oblystary úshin qaldyqtardy basqarý júıesin damytý tujyrymdamalary ázirlendi. Qujatta ınfraqurylymdy jańartý, qaldyqtardy jınaý, tasymaldaý jáne kádege jaratý tıimdiligin arttyrýǵa qatysty naqty usynymdar berilgen, — dedi Sýhrob Hodjımatov.
Onyń sózinshe, óńirlerdiń materıaldyq-tehnıkalyq áleýetin kúsheıtý úshin BUUDB arnaıy qoqys tasıtyn kólikter men eýrokonteınerler satyp alyp, jergilikti jerlerge tapsyrǵan.
Sondaı-aq ortalyq jáne jergilikti memlekettik organdar ókilderiniń qatysýymen jumys kezdesýleri men keńester uıymdastyrylyp, qaldyqtardy basqarý salasyndaǵy áleýetti arttyrý, ulttyq turaqty damý basymdyqtaryna saı zamanaýı tásilderdi engizý máseleleri qaralǵan.
Eske salaıyq, Qazaqstanda turmystyq qaldyqtardy qaıta óńdeý deńgeıin 2030 jylǵa qaraı 40%-ǵa deıin jetkizý josparlanyp otyr.
