BUU júıesindegi mańyzdy laýazymǵa taǵaıyndalýym Elbasynyń halyqaralyq bedeliniń arqasynda júzege asty-Q. Toqaev
ANA. 16 naýryz. QazAqparat /Qanat Mámetqazyuly/ - Birikken Ulttar Uıymy júıesindegi mańyzdy laýazymǵa taǵaıyndalýym Elbasynyń halyqaralyq bedeliniń arqasynda júzege asty.
Búgin QR Parlamenti Senatynyń otyrysynan keıin jýrnalısterge bergen suhbatynda palata spıkeri Qasym-Jomart Toqaev óziniń BUU-nyń Jenevadaǵy bóliminiń bas dırektory bolyp taǵaıyndalǵanyna baılanysty osyndaı pikir bildirdi.
«Eń aldymen, bul - Memleket basshysynyń, bizdiń Prezıdentimizdiń halyqaralyq arenadaǵy zor bedeliniń nátıjesi. Óıtkeni, Prezıdent N. Nazarbaev BUU-nyń Bas hatshysy Pan Gı Mýnmen áńgime barysynda meniń kandıdatýramdy BUU júıesindegi laýazymǵa usynǵan bolatyn. Elbasynyń zor bedeli bolmasa, tike aıtý kerek, mundaı sheshim qabyldanbas edi. Budan bólek, osy taǵaıyndaý Qazaqstannyń halyqaralyq arenadaǵy ornyn kórsetedi. Bizdiń elimiz byltyr asa mańyzdy halyqaralyq forýmdy ótkizdi. Astanada EQYU sammıti tabysty júzege asyp, Astana deklaratsııasy qabyldanǵan bolatyn. Atalmysh qujat negizinen Helsınkı deklaratsııasyn odan saıyn qýattaı túsedi. Sondyqtan da qazirgi kezde barlyq dıplomatııalyq qaýymdastyq Vankýverden Vladıvostokqa deıingi aralyqtaǵy eki mańyzdy elordalar týraly aıtatyn boldy. Olar- Helsınki men Astana»,-dedi Q. Toqaev.
Sonymen qatar Senat spıkeri Memleket basshysynyń ıadrolyq qarýsyzdaný jáne taratpaý týraly jahandyq sammıtke qatysqanyn aıta kele, ondaı ǵalamdyq basqosýda asa mańyzdy bastamalar jasalǵanyna toqtalyp ótti. «Osynyń bári jınaqtala kele, BUU júıesindegi mańyzdy laýazymǵa meniń kandıdatýramdy bekitýge septigin tıgizdi. Degenmen, bul máselede eń aldymen Elbasynyń eńbegi eren»,-dedi Q. Toqaev.
Budan buryn habarlaǵanymyzdaı, Elbasynyń usynysymen BUU Q.Toqaevty uıymnyń Jenevadaǵy bóliminiń bas dırektory etip taǵaıyndaý týraly sheshim qabyldady.
«Memleket basshysy Nursultan Nazarbaev BUU Bas hatshysy Pan Gı Mýnmen telefon arqyly sóılesti. Elbasy BUU basshysymen bolǵan áńgime barysynda halyqaralyq ózekti máselelerdi, onyń ishinde Maǵrıb, Taıaý Shyǵys jáne Ortalyq Azııa elderindegijaǵdaılardy talqylady. Pan Gı Mýn Qazaqstannyń belsendi jáne salmaqty syrtqy saıası qyzmetine rızashylyǵyn bildirdi. Atap aıtqanda, BUU Bas hatshysy Qazaqstannyń EQYU-daǵy sátti tóraǵalyǵyn jáne Astanadaǵy EQYU sammıtiniń tabysty ótkizilgenin atap kórsetti. Pan Gı Mýn sondaı-aq, BUU júıesindegi basshylyq qyzmetke Qasym-Jomart Toqaevty usyný týraly Qazaqstan Prezıdentiniń usynysyn egjeı-tegjeıli zerttegenin jetkizdi. Jáne halyqaralyq qaýipsizdikti jáne ıadrolyq qarý-jaraqty taratpaý rejımin nyǵaıtýǵa qosqan Qazaqstannyń aıtýly úlesin, eldiń áleýmettik-ekonomıkalyq damýdaǵy jáne syrtqy saıasattaǵy jetistikterin eskere otyryp, Qasym-Jomart Toqaevty BUU-nyń Jenevadaǵy bóliminiń Bas dırektory etip taǵaıyndaý týraly sheshim qabyldaǵanyn aıtty», - delingen QR Prezıdenti baspasóz qyzmetiniń 12 naýryzda taratqan habarlamasynda.
