BUU júıesinde Qazaqstannan 71 volonter qyzmet etýde

NUR-SULTAN. QazAqparat – BUU júıesinde Qazaqstannan 71 volonter qyzmet etedi, onyń ishinde 42 áıel bar. Bul týraly QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet aıtty, dep habarlaıdy QazAqparat tilshisi.

«Halyqaralyq volonterlikti damytý jumystary da belsendi júrgizilýde. Búginde BUU júıesinde Qazaqstannan 71 volonter qyzmet etedi, onyń ishinde 42 áıel bar jáne QR Aqparat jáne qoǵamdyq damý mınıstrligi men BUUE arasyndaǵy áriptestik týraly kelisim sheńberinde 7 volonter BUU-nyń túrli agenttikterine jiberilgen», - dedi Madııar Qojahmet Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, Qazaqstan men Reseıdiń volonterlik uıymdary kóshbasshylarynyń qatysýymen volonterlik keńes jumys isteıdi, búgin de osy keńestiń otyrysy ótedi.

«Ótken jyly Memleket basshysy Q.Toqaev BUU Bas Assambleıasynyń 75-shi sessııasynda aldaǵy jyldardyń birin volonterlerdi jumyldyrýdyń halyqaralyq jyly dep jarııalaý bastamasyn kóterdi. Búgingi tańda jaýapty mınıstrlikter men BUU ony ilgeriletý boıynsha jumys júrgizýde. Atap aıtqanda, Damý maqsatynda eriktilerdi jumyldyrýdyń halyqaralyq jylyn jarııalaý týraly BUU-nyń tıisti qararyn qabyldaý máselesi qarastyrylýda.

Sonymen qatar, Memleket basshysynyń tapsyrmasymen bıyl aldaǵy orta merzimdi kezeńge arnalǵan jáne tujyrymdamalyq qadamdardy kózdeıtin volonterlikti damytýdyń 2021 - 2023 jyldarǵa arnalǵan Jol kartasy ázirlendi. Qazir jobany QR Úkimetiniń qaýlysymen qabyldaý kútilýde», - deıdi M. Qojahmet.

Buǵan deıin spıker pandemııa jaǵdaıynda volonterlerdiń qalaı jumys istegenin aıtyp bergen edi.

Zeınetke shyǵarda volonterlik qyzmet ótilin esepke alý sekildi birqatar yntalandyrý sharalary da qarastyrylýda.