BUU júıesinde qansha qazaqstandyq qyzmet etedi

ASTANA. QazAqparat - QR Syrtqy ister mınıstriniń mindetin atqarýshy Muhtar Tileýberdi Birikken Ulttar Uıymy júıesinde Qazaqstan tarapynan qansha adam jumys istep jatqanyn málim etti, dep habarlaıdy QazAqparat.

«Memleket basshysynyń tapsyrmasy boıynsha Syrtqy ister mınıstrligi halyqaralyq uıymdarda Qazaqstan azamattarynyń kóbirek qamtylýy úshin júıelik jumystardy júrgizýde. Onyń ishinde BUU-nyń orny erekshe. Bizdiń málimetterge súıensek, búginde Qazaqstannyń 34-ke jýyq azamaty BUU júıesinde qyzmet etýde, sonyń arasynda 17-si Almatyda ornalasqan BUU-nyń 15 agenttiginde jumys isteıdi», - dedi ol Parlament Májilisiniń jalpy otyrysynda.

Aǵymdaǵy aıda Qazaqstan BUU Qaýipsizdik Keńesine turaqty emes múshe retinde tóraǵalyq etýde.

«Ózderińiz biletindeı, qazirgi ýaqytta Elbasy AQSh-ta saparmen júr jáne 2018 jylǵy 18 qańtarda ótetin «Jappaı qyryp joıý qarýyn taratpaý: senim sharalary» atty joǵary deńgeıdegi taqyryptyq brıfıngke tóraǵa retinde qatysýy josparlanýda. Negizgi baıandamashy retinde BUU Bas hatshysy Antonıo Gýtterısh sóz sóıleıdi», - dep naqtylady M. Tileýberdi.

Aıta keteıik, bul otyrysqa BUU Qaýipsizdik Keńesine múshe memleketteriniń joǵary deńgeıdegi ókilderi qatysady.

«Tóraǵalyqtyń ekinshi ózekti sharasy retinde QR Syrtqy ister mınıstri Qaırat Ábdirahmanovtyń tóraǵalyǵymen «Aýǵanstanda jáne Ortalyq Azııada qaýipsizdikke jáne damýǵa táýeldiliktiń úlgisi retinde aımaqtyq seriktestikti qurý» atty Qaýipsizdik  Keńesiniń mınıstrlik deńgeıindegi pikirtalastary ótedi. Іs-sharada Ortalyq Azııa elderi men Aýǵanstan syrtqy ister mınıstrleriniń, sondaı-aq BUU-ǵa múshe memleketterdiń syrtqy saıası vedomstvolary basshylarynyń qatysýy kútilýde», - dep naqtylady ol.