BUU Joǵary komıssary AQSh-tyń 12 eldiń azamattaryna elge kirýine tyıym salýyna alańdaýshylyq bildirdi

ASTANA. KAZINFORM – BUU-nyń Adam quqyqtary jónindegi Joǵary komıssary Folker Tıýrk beısenbi kúni AQSh-tyń elge kirýge tyıym salý týraly bastamasyna alańdaýshylyq bildirdi, dep habarlaıdy Sınhýa.

Sınhýa-ǵa joldaǵan málimdemesinde ol keń aýqymdy jáne barlyq salany qamtıtyn jańa tyıymdardyń halyqaralyq quqyq turǵysynan alańdaýshylyq týdyratynyn jetkizdi.

F.Tıýrk-tiń sózinshe, halyqaralyq quqyq memleketterdiń óz shekaralaryna qatysty máselelerdi derbes retteýin qoldaıdy. Alaıda memleketter zań aldynda ulty, shyqqan tegi, dini, mıgratsııalyq mártebesine qaramastan alalaýǵa jol bermeı, barlyq azamattardyń quqyqtarynyń birdeı saqtalýyn qamtamasyz etýge mindetti.

- Biz sonymen qatar menmendik pen tákapparlyqqa toly osyndaı málimdemelerdiń sóz bolyp otyrǵan adamdardy AQSh-ta da, ózge elderde de basynýǵa jol berip, olarǵa tózimsizdik tanytyp, jaýyǵý áreketterin qozdyrýy múmkindigine alańdaımyz, - dep qosty Joǵary komıssar.

Aıta keteıik, AQSh prezıdenti Donald Tramp Azııa, Afrıka men Latyn Amerıkasynyń 12 eliniń azamattarynyń elge kirýine tyıym salatyn jáne taǵy 7 eldiń azamattaryna shekteý qoıatyn jarlyqqa qol qoıdy.

Aq úıdiń habarlaýynsha, Aýǵanstan, Mıanma, Chad, Kongo Respýblıkasy, Ekvatorıaldy Gvıneıa, Erıtreıa, Gaıtı, Iran, Lıvııa, Somalı, Sýdan men Iemen azamattaryna AQSh-qa kirýge tyıym salynǵan.

Bul tyıym 9 maýsym kúni kúshine enedi.

Sondaı-aq Býrýndı, Kýba, Laos, Serra-Leone, Togo, Venesýela men Túrikmenstan azamattaryna ishinara kirýge tyıym salyndy.