BUU jasyl energetıka men tsıfrlandyrýǵa kóshýdi jedeldetýge shaqyrdy
ASTANA. KAZINFORM — Klımattyń ózgerýi, tsıfrlyq teńsizdik t. b. jahandyq máselelerdi sheshý úshin halyqaralyq yntymaqtastyqty tereńdetý qajet. Bul jóninde BUU Bas hatshysynyń ekonomıkalyq jáne áleýmettik máseleler boıynsha orynbasary Lı Tszıýnhýa Óńirlik ekologııalyq sammıtte málimdedi.
Sonymen qatar, ol áleýmettik-ekonomıkalyq sektorǵa toqtaldy.
— Adamzatty taza aýyz sý jáne zamanaýı tehnolgııalar tárizdi negizgi qajettiliktermen qamtýda kemshilikter bar. Bul baǵytta teńdikti qamtamasyz ete almaı otyrmyz. Birqatar óńirde klımattyq daǵdarys ta baıqalady, — dedi Lı Tszıýnhýa.
Ol syn-qaterler men kedergilerdi eńserýdiń joldaryn da jetkizdi.
— Jahandyq máselelerdi parasatty sheshimder arqyly sheshe alamyz. Bolashaǵymyz turaqty bolý úshin halyqaralyq yntymaqtastyqty jáne jańartylatyn energııa kózderin damytyp, tsıfrlyq transformatsııany jedeldetý qajet, — dedi BUU Bas hatshysynyń orynbasary.
Sonymen qatar, ol sý resýrstaryn basqarýda jáne ekologııalyq turaqtylyqta uzaq merzimdi jospardyń mańyzyn atap ótti.
Aıta keteıik, buǵan deıin Óńirlik ekologııalyq sammıtte metan shyǵaryndylaryn azaıtý máselesi kóterilgenin jazǵanbyz.
