BUU jańa Bas hatshyny saılaý protsesin bastady
ASTANA. KAZINFORM — Uıymnyń qazirgi Bas hatshysy Antonıý Gýterrıshtiń mandaty 2026 jyldyń 31 jeltoqsanynda aıaqtalady, dep habarlaıdy TASS.
Birikken Ulttar Uıymynyń Qaýipsizdik Keńesi men Bas Assambleıasy birlesken hat shyǵaryp, álemdik uıymnyń jańa Bas hatshysyn saılaý týraly bastama kóterdi. Qujatty Qaýipsizdik keńesine tóraǵalyq etetin Serra-Leoneniń BUU janyndaǵy Turaqty ókildiginiń baspasóz qyzmeti taratqan.
Qujatta kandıdattardy usyný men irikteý protsesin bastaý jáne kelesi Bas hatshyny taǵaıyndaý týraly aıtylǵan.
Birlesken hatta dúnıejúzilik uıymnyń tarıhynda birde-bir áıel basshy bolyp taǵaıyndalmaǵany atap ótiledi. Sondyqtan uıymǵa múshe elderge áıelderdi kandıdat retinde usyný máselesin baıyppen qaraý usynyldy.
— Biz Bas hatshyny tańdaýda óńirlik ártúrliliktiń mańyzdylyǵyn qarastyramyz, — delingen qujatta.
BUU Bas hatshysy laýazymyna kandıdatty uıymǵa múshe memleketter usynady. Ár el bir kandıdat usynýǵa quqyly. Memleketter úmitkerdi usyný úshin Qaýipsizdik Keńesi men Bas Assambleıanyń prezıdentterine hat jiberýi kerek. Úmitkerler óz kezeginde uıymnyń damýyna óz kózqarasyn, sondaı-aq tabys kózin kórsetýi kerek. Eger ótinish berýshi BUU agenttiginde jumys isteıtin bolsa, hatta olar «múddeler qaqtyǵysyn boldyrmaý úshin saılaý naýqany kezinde BUU-daǵy jumysyn toqtatýdy qarastyrýy kerek» delingen.
Bas hatshyny saılaý kelesi jyldyń shilde aıynyń sońyna josparlanǵan. Qazirgi ýaqytta jahandyq uıymnyń basshysy laýazymyna úmitker bolýǵa eki adam qyzyǵýshylyq tanytty. Olar Atom energııasy jónindegi halyqaralyq agenttiktiń basshysy Rafael Grossı jáne BUU Saýda jáne damý konferentsııasynyń Bas hatshysy Rebekka Grınspan.
BUU-nyń qazirgi Bas hatshysy Antonıý Gýterrıshtiń ókilettigi 2026 jyldyń 31 jeltoqsanynda aıaqtalady.
Bas hatshyny BUU Qaýipsizdik Keńesi saılaıdy jáne Bas Assambleıa bekitedi. Onyń ókilettik merzimi 5 jyl, uzartylýy múmkin. Merzimge shekteý joq, biraq 10 jyldan astam qyzmet atqarǵan adam joq. Qalyptasqan tájirıbege sáıkes, BUU basshysy Qaýipsizdik Keńesiniń turaqty músheleri — Reseı, Ulybrıtanııa, Qytaı, AQSh jáne Frantsııa memleketteri arasynan saılanbaıdy.
Aıta keteıik, qyrkúıek aıynda Memleket basshysynyń Jarlyǵymen Erjan Qazyhan Jeneva qalasyndaǵy (Shveıtsarııa) Birikken Ulttar Uıymynyń bólimshesi men basqa da halyqaralyq uıymdar janyndaǵy Qazaqstan Respýblıkasynyń Turaqty ókili laýazymyna taǵaıyndaldy.