BUU Iemende qaýipsizdik jaǵdaıy nasharlaǵanyn málimdedi
ASTANA. KAZINFORM – BUU-nyń Adam quqyqtary jónindegi Joǵarǵy komıssary Iemendegi áskerı qımyldardyń shıelenisýi aıasynda beıbit turǵyndar arasynda qurbandar sanynyń kúrt ósýine alańdaýshylyq bildirdi, dep habarlaıdy BUU jańalyqtar qyzmeti.
Folker Tıýrk jaǵdaıdyń odan ári nasharlaýyna jol bermeý úshin taraptardy shıelenisti dereý báseńdetýge shaqyrdy.
Joǵarǵy komıssar basqarmasynyń málimetinshe, 6 tamyzdan beri úkimet baqylaýyndaǵy aýdandarda «Ansar Alla» tobynyń shabýyldary saldarynan keminde 17 beıbit turǵyn qaza taýyp, jaralanǵan. Sondaı-aq shilde aıynyń sońynda osy qozǵalys baqylaýyndaǵy aýdandarda taǵy eki adam ólimine ákelgen oqıǵa tirkeldi.
— Barlyq taraptardy shıelenisti báseńdetip, Iemen halqyn odan ári azap shegýden qorǵaýǵa shaqyramyn. Iemendikter onsyz da kóp qıyndyqty bastan ótkerdi, kóp jylǵa sozylǵan qaqtyǵys, jappaı qonys aýdarý jáne gýmanıtarlyq daǵdarysqa ákeldi, — dedi Tıýrk.
Sońǵy oqıǵalardyń qatarynda 7 tamyzda «Ansar Alla» toby ushyrǵan zymyrannyń Marıbtegi ishki qonys aýdarýshylar lagerine soqqy jasaýy bar. Sonyń saldarynan alty adam, onyń ishinde bir bala zardap shekti.
9 tamyzda Ál-Moha qalasyna zymyrandar men ushqyshsyz ushý apparattary arqyly jasalǵan shabýyldan úsh port jumysshysy qaza taýyp, taǵy tórteýi jaralandy. Joǵarǵy komıssar basqarmasy 14 jáne 15 tamyzda portqa jasalǵan jańa soqqy týraly habarlamany da tekserip jatyr. Bul shabýyldardan da adamdar zardap shegýi múmkin.
11 tamyzda «Ansar Alla» qozǵalysy Bab-el-Mandeb buǵazynda júk kemesine shabýyl jasady. Sonyń saldarynan ekıpajdyń tórt múshesi — Pákistannyń úsh jáne Indonezııanyń bir azamaty qaza taýyp, birneshe adam jaralandy.
Tıýrk barlyq tarap halyqaralyq gýmanıtarlyq quqyq normalaryn saqtaýǵa, beıbit turǵyndar men azamattyq nysandarǵa shabýyl jasaýdan bas tartýǵa jáne halyq arasynda qurbandardyń bolýyna jol bermeý úshin barlyq qajetti sharalardy qabyldaýǵa mindetti ekenin atap ótti.
— Azamattyq ınfraqurylymǵa jasalǵan shabýyldar halyqtyń qasiretin odan ári kúsheıtedi. Qazirdiń ózinde keminde 18 mıllıon ıemendik azyq-túlik tapshylyǵyn bastan ótkerip otyr. Bul soqqylar dereý toqtatylýy kerek, — dedi BUU-nyń Adam quqyqtary jónindegi Joǵarǵy komıssary.
Buǵan deıin hýsıtterdiń Iemen úkimeti kúshteriniń áskerı lagerlerine soqqy jasaǵany habarlanǵan.
