BUU: Iemen soǵystyń jańa ári qaýipti kezeńine ótti
ASTANA. KAZINFORM – BUU Bas hatshysynyń Iemen jónindegi arnaıy ókili Hans Grýndberg Qaýipsizdik Keńesinde eldegi jaǵdaıdyń kúrt nasharlaǵanyn málimdedi. Bul týraly News.un.org jazdy.
«Ansar Allah» qozǵalysy Iemenniń batys jaǵalaýyndaǵy Moha portty qalasyn basyp alyp, Bab-el-Mandeb buǵazyna shyǵatyn jolǵa baqylaýyn kúsheıtti. Qala buǵazdan shamamen 75 shaqyrym jerde ornalasqan. Bul teńiz dálizi arqyly álemdik saýda men energetıkalyq resýrstardyń edáýir bóligi tasymaldanady.
Grýndbergtiń aıtýynsha, qala úshin shaıqas jalǵasyp, jaǵdaı tez ózgerip jatyr. Hýsıtterdiń Mohany baqylaýyna alýy halyqaralyq qaýymdastyqty alańdatyp otyr, sebebi bul teńiz qatynasynyń qaýipsizdigine qater tóndiredi.
– Ótken aıda Qaýipsizdik Keńesinde sóılegenimde, Iemen 2022 jylǵy bitimnen beri aýqymdy qaqtyǵysqa qaıta oralý qaýpine tap bolǵanyn eskertken edim. Endi bul qaýip aýyr shyndyqqa aınaldy, – dedi arnaıy ókil.
Qyrkúıektiń basynan beri eldiń birneshe óńirinde qaqtyǵystar kúsheıdi. Ásirese strategııalyq mańyzy bar batys jaǵalaýdaǵy shaıqastar órshidi. Marıb, ál-Djaýf jáne ál-Beıda provıntsııalarynda da qaqtyǵystar tarady.
Birneshe óńirde beıbit turǵyndar qaza tapqany týraly aqparat bar. Marıbte qonys aýdarǵandar ornalasqan jerlerdiń atqylanýynan balalar qaza taýyp, ýaqytsha baspanalar qıraǵan. Gýmanıtarlyq uıymdardyń málimetinshe, 3 qyrkúıekten beri el boıynsha 11 400-den astam otbasy úılerin tastap ketýge májbúr bolǵan.
«Ansar Allah» Saýd Arabııasynyń azamattyq jáne energetıkalyq nysandaryna da soqqy jasap, ondaǵan beıbit turǵyn jaralanǵan. BUU bul shabýyldardy aıyptady. Grýndberg hýsıtterdi Iemen aýmaǵynda jáne Saýd Arabııasyna qarsy shabýyldardy toqtatýǵa, sondaı-aq kommertsııalyq kemelerge tónetin qaýipten bas tartýǵa shaqyrdy.
Arnaıy ókildiń pikirinshe, qaqtyǵystyń qaıta órshýi BUU araǵaıyndyǵymen 2022 jyly jasalǵan bitimnen keıin tórt jyldan astam ýaqyt saqtalǵan salystyrmaly tynyshtyqtyń aıaqtalǵanyn bildiredi.
– Bul jaǵdaıdyń aldyn alýǵa bolatyn edi. Iemen halqynyń talaptaryn kelissóz ústelinde talqylaýǵa bolady, – dedi Grýndberg.
Ol Iemen úkimetimen, «Ansar Allah» ókilderimen jáne óńir elderimen kelissózderdi jalǵastyratynyn atap ótti.
Aıta keteıik, buǵan deıin Iemen úkimetiniń áskeri hýsıtterge qarsy shabýyl bastaǵanyn jazdyq.
Al maýsym aıynda Iemende bes mıllıon adam azyq-túlik tapshylyǵyn tartyp otyrǵany habarlandy.
Keshe BUU Ońtústik Sýdandaǵy alǵashqy saılaýǵa qaýip tónip turǵanyn eskertti.
