BUU Venesýeladaǵy jaǵdaıǵa alańdaýly
ASTANA. QazAqparat - Birikken Ulttar Uıymy Venesýelany jaılaǵan tártipsizdikterge qatysty alańdaýshylyq bildirip otyr, dep habarlaıdy 24.kz.
Halyqaralyq qaýymdastyq ókilderi jergilikti bılik pen oppozıtsııany dıalog júrgizý arqyly bir mámilege kelýge shaqyrdy.
«BUU Venesýelada jańa qaqtyǵystar týyndaýy múmkin dep qaýiptenip otyr. Mundaı jaǵdaıdy boldyrmaý úshin úkimet pen oppozıtsııa bılik tarmaqtary arasynda ókilettikti bólý, adam quqyqtary men eldegi áleýmettik-ekonomıkalyq ahýalǵa qatysty kelissózder júrgizýi qajet»,-deıdi BUU Bas hatshysynyń baspasóz qyzmetiniń jetekshisi Stefan Dıýjarrık.
Joǵarǵy sot - eldegi zań shyǵarýshy organ ulttyq assambleıanyń bıligin shekteý týraly sheshimdi sáýirdiń basynda qabyldaǵan bolatyn. Alaıda artynsha ony keri qaıtaryp alǵanymen, Venesýelada jappaı ereýilder tolas tappady. Kóp jaǵdaıda narazylyq sharasy polıtseılermen qaqtyǵysqa ulasyp jatyr.
Sońǵy eki kún ishinde tártipsizdikterge baılanysty 585 adam qamaýǵa alynǵan. Sondaı-aq, 3 adam qaza taýyp, 220-dan astamy jaralandy. Eldegi ahýaldyń ýshyǵa túsýine baılanysty buǵan deıin prezıdent Nıkolas Madýro qarýly kúshterdi joǵary daıyndyq jaǵdaıyna kóshirýge buıryq berdi.
