BUU UNRWA agenttiginiń jumysyn tekseretin komıssııa taǵaıyndaldy

ASTANA. KAZINFORM - BUU Bas hatshysy Antonıý Gýterrısh BUU-nyń palestınalyq bosqyndarǵa kómek kórsetý jáne jumysty uıymdastyrý jónindegi agenttiginiń (UNRWA, BAPOR) qyzmetin baǵalaý úshin táýelsiz komıssııa qurylǵanyn habarlady.

Topty Frantsııanyń burynǵy syrtqy ister mınıstri Ketrın Kolonna basqarady, delingen BUU Bas hatshysynyń áleýmettik jelidegi paraqshasynda.

Kómek kórsetý agenttigi Izraıldiń 7 qazanda HAMAS-tyń Izraılge jasaǵan shabýyldaryna onyń 12 qyzmetkeriniń qatysy bar dep aıyptaýyna baılanysty synǵa ushyrady.

Osydan keıin AQSh, Germanııa, Ulybrıtanııa jáne Shvetsııany qosa alǵanda, onnan astam el agenttikti qarjylandyrýdy toqtatty.

"Táýelsiz komıssııany Frantsııanyń burynǵy syrtqy ister mınıstri Ketrın Kolonna basqarady jáne ol úsh eýropalyq zertteý uıymymen jumys isteıdi" delingen BUU málimdemesinde.

Táýelsiz baǵalaý boıynsha jumys isteıtin eýropalyq zertteý toptary: Shvetsııadaǵy Raýl Vallenberg ınstıtýty, Norvegııadaǵy Hra Mıhelsen atyndaǵy ınstıtýt jáne Danııanyń adam quqyqtary ınstıtýty.

Tergeýdiń maqsaty – «agenttik beıtaraptyqty qamtamasyz etý úshin qolynan kelgenniń barlyǵyn jasap jatqanyn baǵalaý jáne aýyr buzýshylyqtar týraly málimdemelerge jaýap berý».

Komıssııa naýryzdyń sońynda Gýterreshke aralyq esep jáne sáýirdiń sońynda qorytyndy esep berýi tıis.