BUU Twitter-ge qatysty Ilon Maskqa úndeý jasady

SINЬHÝA-QazAqparat – BUU-nyń Adam quqyqtary jónindegi joǵarǵy komıssary Folker Tıýrk senbide Twitter-diń bas atqarýshy dırektory Ilon Maskqa ashyq hat joldap, osy áleýmettik medıa arnasyn basqarýda adam quqyqtaryn basty orynǵa qoıýǵa shaqyrdy, dep habarlaıdy QazAqparat Sınhýa agenttigine silteme jasap.

Hat kompanııanyń juma kúni qyzmetkerlerdi, sonyń ishinde Twitter-de adam quqyqtary men etıka erejelerin saqtaýǵa jaýapty mamandar tobyn jappaı jumystan shyǵarý týraly habarlamalardan keıin jetti.
«Bizdiń ortaq quqyqtarymyzdy saqtaý platformany paıdalaný men evolıýtsııa shegin anyqtaýy kerek», - dep jazdy Folker Tıýrk.
Ol óziniń hatynda Twitter-di jeke ómirge qol suǵylmaýshylyq quqyǵyn qorǵaýǵa shaqyrdy jáne kompanııada basqa adamdardyń quqyqtaryn buzatyn kontentti taratpaý jaýapkershiligi bar ekenin atap ótti.
27 qazanda Mask Twitter-di satyp alý týraly kelisimdi japty. Jańa ıesi paıdalanýshylardy únemi buǵattaý tájirıbesin joıady dep kútilýde. Kásipker Twitter-di moderatsııalaý máselesin zertteýmen aınalysatyn arnaıy keńes quryp jatqanyn málimdedi.
Sondaı-aq Ilon Mask kompanııanyń dırektorlar keńesin ýaqytsha taratty jáne kompanııany basqarý tolyǵymen ýaqytsha Ilon Masktyń baqylaýyna ótti. Bul týraly kásipkerdiń ózi habarlady.
Buqaralyq aqparat quraldarynyń habarlaýynsha, juma kúni shyǵyndardy azaıtý maqsatynda myńdaǵan qyzmetker jumystan shyǵaryldy

Foto: bb.lv