BUU Tramp pen Pýtınniń sammıtin ótkizýge daıyn ekenin málimdedi

ASTANA. KAZINFORM — BUU AQSh pen Reseı prezıdentteri Donald Tramp pen Vladımır Pýtın arasyndaǵy yqtımal sammıtti óz shtab-páterinde ótkizýge daıyn ekenin málimdedi. Bul týraly uıym bas hatshysynyń orynbasary Stefanı Tremble jýrnalısterge arnalǵan brıfıngte aıtty, dep habarlaıdy TASS.

Onyń aıtýynsha, qazirgi ýaqytta mundaı kezdesý ótkizý týraly resmı suranys túspegen jáne shtab-páterde sammıt ótkizý máselesi talqylanǵan joq.

«Qazirgi tańda taraptar bul nusqany qarastyryp jatqan joq sııaqty», – dedi ol.

Sonymen qatar Tremble BUU-nyń dıalogqa árdaıym ashyq ekenin atap ótti.

«Biz árqashan dıalogty qoldaımyz jáne BUU Jarǵysyna sáıkes Ýkraınadaǵy áskerı is-qımyldardy toqtatý jolynda progreske qol jetkiziledi dep úmittenemiz», – dedi BUU ókili.

Aıta keteıik, BUU Izraıldi Gazany tolyq okkýpatsııalaýdy toqtatýǵa shaqyrdy.