BUU: Temekini jaı qorappen satý oǵan suranysty azaıtady

ASTANA. QazAqparat - BUU temekimen kúresti kúsheıtýdi, onyń qorabynda belgi, temeki markasy jáne jarnamany paıdalanýǵa tyıym salýdy usyndy. Temekisiz álem kúnine oraı osyndaı málimdeme jasaldy.

Dúnıejúzilik densaýlyq saqtaý uıymynyń (DDSU) sarapshylarynyń pikirinshe, birqatar elderdiń temekini jaı qorappen satýǵa kóshýi temeki ónimderine suranysty azaıtqan.

DDSU barlyq elderge temeki qorabynda tek qara árippen ǵana taýar belgisi men ónim ataýyn jazýǵa kóshýdi usynady.

2012 jyldyń osńynda Avstralııa birinshi bolyp jaı qorapqa tolyǵymen kóshti. Sońǵy jyldary elde temeki shegetinderdiń sany turaqty túrde azaıyp keledi. 20 mamyrdan bastap Frantsııa men Ulybrıtanııa ádemi qoraptarǵa tyıym salatynyn málim etti.

«Qarapaıym qorap temekiniń tartymdylyǵyn azaıtady. Ol adam densaýlyǵyna keri áser etetin temekiniń tartymdylyǵyn joıady», dep málim etti DDSU Bas dırektory Margaret Chan.

Temeki saldarynan adam densaýlyǵyna tónetin qaýip densaýlyq saqtaý salasyndaǵy eń aýqymdy qaterlerdiń biri. Árbir alty sekýnd saıyn álemde osyndaı aýrýdan bir adam óledi. Bul jylyna alty mıllıon ólimge deıin jetedi. Eger qatań sharalar qolǵa alynbasa 2030 jyldary bul kórsetkish segiz mıllıonǵa jetýi múmkin.