BUU Taıaý Shyǵystaǵy shıelenistiń gýmanıtarlyq saldary aýyr bolatynyn eskertti

ASTANA.KAZINFORM - Aımaqta bolyp jatqan zorlyq-zombylyq BUU-nyń jaýap berý múmkindigin shektep otyr.

BUU-nyń gýmanıtarlyq kómek jónindegi basshysy Tom Fletcherdiń aıtýynsha, áýe keńistiginiń jabylýy personaldyń kelýine jáne ketýine kedergi keltiredi, al Irandaǵy halyqaralyq úkimettik emes uıymdardyń shekteýli qatysýy jaǵdaıdy ýshyqtyryp otyr, - dep habarlaıdy CNN.

- Eger energetıkalyq baǵyttar nemese Ormýz buǵazy sııaqty teńiz dálizderi odan ári buzylsa, azyq-túlik baǵasy kúrt ósedi, densaýlyq saqtaý júıesi qysymǵa ushyraıdy jáne ımportqa táýeldi elderde qajetti taýarlar qysqarady, - dedi Fletcher.

Ormýz buǵazy - Iran jaǵalaýyndaǵy tar arna, ol arqyly álemde tutynylatyn munaıdyń shamamen 20%-y ótedi. Iran buǵaz arqyly ótetin kez kelgen kemege shabýyl jasaýǵa ýáde berdi, al munaı baǵasy osy arna arqyly ótetin aǵyn toqtatylǵaly kúrt ósti.

Lıvanda Izraıl áskerıleri Iran qoldaıtyn «Hezbolla» sodyrlar tobyn nysanaǵa alyp jatqanyn málimdedi, al BUU Izraıldiń shabýyldary ondaǵan adamnyń ómirin qıyp, kópshiliktiń qonys aýdarýyna sebep bolǵanyn habarlady.

BUU málimetteri boıynsha, Izraıldiń 100-den astam qala men aýyldan kelgen evakýatsııa týraly eskertýlerinen keıin 60 000-nan astam adam 330 ýaqytsha baspanaǵa ornalastyrylǵan.

Buǵan deıin Izraıl Lıvanǵa shabýyldaryn keńeıtken bolatyn.