BUU: Taıaý Shyǵystaǵy qaqtyǵystar týrızm ósimin baıaýlatty
ASTANA. KAZINFORM — BUU Týrızm uıymy 2026 jyly álem boıynsha halyqaralyq týrıster sanynyń ósimi jónindegi boljamyn burynǵy 3–4 paıyzdan 1–2 paıyzǵa deıin tómendetti.
Uıym 17 qyrkúıekte jarııalaǵan «Álemdik týrızm barometriniń» jańa shyǵarylymynda bıylǵy jyldyń alǵashqy jartysynda halyqaralyq týrıster sany ótken jyldyń sáıkes kezeńimen salystyrǵanda nebári 0,4 paıyzǵa óskeni aıtylǵan.
Esepke sáıkes, qańtar–maýsym aılarynda shamamen 690 mln adam halyqaralyq saparǵa shyqqan. Bul ótken jyldyń osy kezeńimen salystyrǵanda shamamen 3 mln adamǵa kóp.
Birinshi toqsanda halyqaralyq týrıster sany 2 paıyzǵa artsa, ekinshi toqsanda 1 paıyzǵa tómendegen. Al maýsym aıynda bul kórsetkish jyldyq eseppen 3 paıyzǵa azaıdy.
Taıaý Shyǵystaǵy qaqtyǵystardyń tikeleı áserinen óńirge kelgen halyqaralyq týrıster sany jyldyń alǵashqy alty aıynda 22 paıyzǵa qysqardy.
BUU Týrızm uıymynyń bas hatshysy Shaıha Nasser ál-Nývaıs sońǵy derekter týrızm salasyndaǵy ósimniń tolyq toqtamaǵanyn, alaıda onyń áli de turaqsyz ekenin kórsetetinin atap ótti.
- Taıaý Shyǵystaǵy jaǵdaıdyń áseri óńirden tys týrıstik baǵyttarǵa da sezile bastady, — dedi ol.
Uıymnyń boljamynsha, joǵary baǵalar men jahandyq belgisizdik jaǵdaıynda halyqaralyq týrıster shyǵyn men sapa araqatynasyna kóbirek mán berip, jaqyn baǵyttardy nemese ishki týrızmdi jıi tańdaıdy.
Aıta keteıik, buǵan deıin 2026 jyldyń segiz aıynda Antalıaǵa barǵan týrıster sany 6%-ǵa azaıyp, óńirdiń týrızm salasyndaǵy shyǵyn júzdegen mıllıon eýroǵa baǵalanǵany habarlanǵan edi.
