BUU tálipterden áıelderge qatysty shekteýlerdi toqtatýdy talap etti
ASTANA. KAZINFORM – BUU Qaýipsizdik Keńesi Aýǵanstanǵa qatysty qarardy biraýyzdan qabyldap, bıliktegi «Talıban» qozǵalysyn áıelder men qyzdarǵa qoıylǵan shekteýlerdi joıýǵa jáne terrorıstik toptarǵa qarsy kúresti kúsheıtýge shaqyrdy, dep habarlaıdy AP.
Sonymen qatar Qaýipsizdik Keńesi Aýǵanstandaǵy gýmanıtarlyq baǵdarlamalardy iske asyryp, eldegi saıası dıalogty qoldaýmen aınalysatyn BUU-nyń Aýǵanstanǵa járdem kórsetý mıssııasynyń mandatyn 2027 jylǵy maýsymǵa deıin uzartty.
Qytaıdyń BUU janyndaǵy turaqty ókili Fý Tsýnnyń aıtýynsha, halyqaralyq qaýymdastyq Aýǵanstan bıligi adam quqyqtaryn, eń aldymen áıelderdiń quqyqtaryn qorǵaý baǵytynda qosymsha qadamdar jasaıdy dep kútedi.
Qarar gýmanıtarlyq baǵdarlamalardy odan ári qoldaýdy jáne jynysyna, dinine nemese etnıkalyq tegine baılanysty kemsitýsiz ulttyq ári jergilikti basqarýdy damytýǵa járdem kórsetýdi kózdeıdi.
Qujatta áıelderdiń, jastardyń, azshylyq ókilderiniń jáne múmkindigi shekteýli adamdardyń qoǵamdyq ómirge tolyqqandy qatysýynyń mańyzdylyǵy da erekshe atap ótilgen.
Qarardyń qabyldanýy Gerat qalasynda kıim kııý talaptaryn buzdy degen kúdikpen keminde 30 áıeldiń ustalǵany týraly habarlardan keıin boldy. Aýǵanstandaǵy BUU mıssııasynyń málimetinshe, ustalǵandardy qoldaǵan narazylyq aktsııalaryn qaýipsizdik kúshteri tarqatqan. Sonyń saldarynan bir adam qaza taýyp, birneshe adam jaralanǵan.
«Talıban» qozǵalysy 2021 jyly bılikke qaıta oralǵannan keıin áıelder men qyzdarǵa qatysty qatań shekteýler engizdi. Olardyń qatarynda bastaýysh mektepten keıin bilim alýǵa tyıym salý jáne eńbek qyzmetine qatysty shekteýler bar.
AQSh-tyń BUU janyndaǵy turaqty ókiliniń orynbasary Djennıfer Lochetta saıası úderistiń nátıjeliligi aýǵan bıliginiń naqty is-áreketterine baılanysty ekenin aıtty.
Buǵan deıin tálipterdiń qyzdardyń únsizdigin nekege kelisim retinde tanıtyny habarlanǵan. Bul erejeler jańa normatıvtik qujatqa engizilgen. Sondaı-aq qujatta kámelet jasyna tolǵannan keıin balalar nekesin sot arqyly jaramsyz dep taný múmkindigi qarastyrylǵan.
Sonymen birge áıelderge Aýǵanstanda talıbterdiń bılikke kelgen kúnine arnalǵan merekelik is-sharalarǵa qatysýǵa tyıym salyndy.
Eske sala ketsek, tálipter áıelderge paranjasyz aýrýhanaǵa barýǵa jáne taksıge otyrýǵa tyıym saldy. Al áıelin urǵandar jarty aıǵa, ıtti qorlaǵandar 5 aıǵa qamalady.
