BUU: Sýdannan qonys aýdarǵan 4 mln adam óz úılerine oraldy
ASTANA. KAZINFORM — Sýdanda tórt jyldan beri armııa men Jedel áreket etý kúshteri (JÁK) arasyndaǵy qaqtyǵystar jalǵasyp keledi, dep jazdy Anadoly agenttigi.
Halyqaralyq kóshi-qon uıymynyń basqarý jáne reformalar jónindegi bas dırektorynyń orynbasary Sýng A Lı málimetinshe, elde shamamen 4 mıllıon adam óz úılerine óz erkimen oralǵan. Alaıda bul aımaqtarǵa ınvestıtsııa tartylmasa, qaıtarý úderisi qaýipke ushyraýy múmkin.
Ol Jenevada ótken BUU-nyń aptalyq brıfıngine onlaın formatta Hartým qalasynan qatysqan.
Lıdiń aıtýynsha, úsh jyldan astam jalǵasqan qaqtyǵys saldarynan Sýdan halqy aýyr jaǵdaıǵa tap bolyp otyr. Kóptegen otbasylar qıyn ári sharshatatyn joldardan keıin óz úılerine qaıta oralýda.
— Sýdannyń shamamen 4 mıllıon turǵyny, ásirese El-Djazıra shtatynda, óz týǵan jerlerine oraldy. Kóptegen adamdar Hartým men El-Djazıraǵa qaýipsizdik jaǵdaıy jaqsardy dep senip qaıtyp jatyr. Basqalary bosqyn retinde ómir súrýdiń aýyr jaǵdaılary, ekonomıkalyq qysym jáne otbasylarymen qaıta qosylý qajettiligi sebepti, sondaı-aq kórshi elderdegi jaǵdaıdyń nasharlaýyna baılanysty oralýda, — dedi ol.
Uıym ókili bul úrdis sýdandyqtardyń qıyndyqqa qaramastan ómirin qaıta qalpyna keltirýge degen tabandylyǵyn kórsetetinin atap ótti.
Sonymen qatar ol qaıtyp oralǵan adamdardyń jaǵdaıy áli de óte aýyr ekenin aıtty.
— Úıge oralý — qalpyna keltirýdiń bastaýy bolǵanymen, qazirgi Sýdanda ol kóbine ómir súrý úshin kúrestiń bastalýy bolyp otyr. Qaqtyǵystyń saldary el boıynsha áli de óte aýyr, — dedi Lı.
Onyń aıtýynsha, adamdar qıraǵan úıler men búlingen ınfraqurylymǵa oralýda. Eger negizgi qyzmetter men ınfraqurylymdy qalpyna keltirýge shuǵyl ınvestıtsııa salynbasa, qaýipsiz ári turaqty qaıtarý úderisi qaterge ushyraıdy.
Daǵdarys kezinde shamamen 12 mıllıon adam qatty zardap shekken aımaqtardan kóship ketken, 4,5 mıllıonnan astamy kórshi elderge ótken. Qazirgi tańda shamamen 9 mıllıon adam áli de ishki qonys aýdarǵan kúıde qalyp otyr.
Aıta keteıik, buǵan deıin elden bezgen Sýdan bosqyndary Marokkoda da tyǵyryqqa tirelgenin jazǵan edik.