BUU Sýdandaǵy zorlyq-zombylyqty toqtatýǵa shaqyrady

ASTANA. KAZINFORM — Sýdannyń soltústik Darfýr shtatyndaǵy El-Fashırde adam óltirý, zorlaý jáne etnıkalyq zorlyq-zombylyq beleń alyp barady. Bul týraly BUU jańalyqtary habarlady. 

BUU-nyń Adam quqyqtary jónindegi Joǵarǵy komıssary Folker Tıýrktiń aıtýynsha, qaladan qashyp shyqqandar da qylmyskerlerdiń qurbanyna aınaldy. El-Fashırden shyǵatyn joldarda qatygezdik kóbeıgen.  

Ol sonymen qatar kórshiles Kordofan aımaǵynda bolyp jatqan oqıǵalar týraly eskertti. Jedel aralasý kúshteri El-Fashırdi basyp alǵannan keıin ondaǵy beıbit turǵyndardyń sany artty.

— Eshqandaı deeskalatsııa belgileri joq. Kerisinshe, mundaǵy oqıǵalar soǵysty kúsheıtýge naqty daıyndyqty kórsetedi, — dedi Folker Túrik. 

Sýdanda jumys isteıtin BUU toby Kordofandaǵy zorlyq-zombylyqtyń kúsheıýin, sonyń ishinde birneshe qalanyń qorshaýǵa alynýyn aıyptady.

— Biz halyqaralyq gýmanıtarlyq quqyq aıqyn buzylyp jatqanyn jáne beıbit turǵyndar men azamattyq ınfraqurylymǵa jasalyp jatqan shabýyldarǵa qatty alańdaımyz, — delingen toptyń málimdemesinde.

Sondaı-aq soǵys halyqtyń azyq-túlikke, dári-dármekke jáne negizgi qajettilikterge qol jetkizýin shekteıtinin atap ótti. Fermerler egistigin óńdeı almaı, ónimderin bazarlarda sata almaı keledi. Bul asharshylyq qaýpin odan ári arttyratyny sózsiz.

Qazirdiń ózinde ońtústik Kordofan shtatyndaǵy Kadýglı qalasynda asharshylyqqa ákeletin jaǵdaılar tirkelgen.

— Biz áskerı operatsııalarǵa qatysqandardyń barlyǵyn beıbit turǵyndardy, sondaı-aq medıtsınalyq jáne gýmanıtarlyq qyzmetkerlerdi, ásirese qorshaýdaǵy aımaqtardan qashyp ketkenderdi jáne halyqqa qoldaý kórsetetin jergilikti alǵashqy áreket etýshilerdi qorǵaýǵa shaqyramyz, — dedi BUU toby.

Olar sondaı-aq azamattyq ınfraqurylymdy, sonyń ishinde aýrýhanalar men bazarlardy qorǵaýǵa, balalardy urlaý men jumysqa tartýdy toqtatýǵa shaqyrdy.

BUU málimetinshe, qazir Sýdanda 21,2 mıllıon adam ashtyqqa tap bolǵan.