BUU: Sýdandaǵy qaqtyǵystar 332 myńnan asa adamdy úılerin tastap ketýge májbúr etti

ASTANA. KAZINFORM – Sýdanda qaqtyǵystar qaıta jandanyp, el batysyndaǵy El-Fasher qalasyndaǵy Zamzam bosqyndar lagerin 332 myńnan astam adam tastap ketýge májbúr boldy. Bul týraly BUU quramyna kiretin Halyqaralyq kóshi-qon uıymy (HKU) málimdedi, dep jazady Anadoly.

Uıym málimetinshe, 13 sáýirden bastap lagerden 66 405 otbasy – jalpy sany 332 025 adam kóship ketken. Olar qazir eldiń Soltústik jáne Ortalyq Darfýr aımaqtaryna qaraı aýysyp jatyr. 

12 sáýir kúni elde áreket etetin «Jyldam áreket etý kúshteri» (RSF) El-Fasher qalasyna shabýyldy kúsheıtip, bir jyldan astam ýaqyt qorshaýda turǵan qalaǵa kirmek bolǵan.

13 sáýirde RSF Zamzam lagerin baqylaýǵa alǵanyn habarlady.

BUU málimeti boıynsha, RSF shabýyldarynan 400-ge jýyq beıbit turǵyn kóz jumǵan, taǵy on myńdaǵan adam bosqynǵa aınaldy.

Sýdan qaqtyǵysy úshinshi jylǵa ulasty

2023 jyldyń 15 sáýirinen bastap Sýdanda úkimettik armııa men RSF jasaǵy arasynda qaqtyǵystar bastalyp, el ishindegi eń iri qantógiske aınaldy. BUU bul qaqtyǵysty álemdegi eń aýqymdy ishki bosqyndar daǵdarysy dep sıpattap otyr.

Qaqtyǵys bastalǵaly beri Sýdannyń óz ishinde 11 mıllıonnan astam adam qonys aýdarýǵa májbúr boldy. Taǵy shamamen 4 mıllıon adam kórshiles elderge bas saýǵalap ketken.

Sýdan armııasy keıingi aılarda el astanasy Hartýmnyń kóp bóligin baqylaýyna qaıtaryp alǵanymen, RSF kúshteri batys aımaq — Darfýr óńirinde belsendi áreketterin jalǵastyryp jatyr. 

Aıta keteıik, Sýdan áskeri prezıdent saraıyn baqylaýyna alǵanyn málimdegen bolatyn. 

Buǵan deıin de BUU halyqaralyq turaqtylyq úshin shuǵyl áreket kerektigin aıtyp, dabyl qaqqan.