BUU Statıstıka bıýrosynyń jumysyna baǵa beredi
ASTANA. KAZINFORM – Birikken Ulttar Uıymynyń Eýropalyq ekonomıkalyq komıssııasynyń (BUU EEK) sarapshylary Ulttyq statıstıka bıýrosynyń qyzmetine úsh kúndik salalyq sholý júrgizýdi bastady. Negizgi nazar GAMSO/GSBPM jáne GSIM modelderin engizýge, sondaı-aq statıstıkalyq óndiristi protsestik basqarý qaǵıdattaryna kóshirýge aýdarylyp jatyr.
BUU EEK halyqaralyq sarapshylar tobyn óńirlik keńesshi Taeke Gıaltema basqarady. Top quramyna sondaı-aq Islandııa Statıstıka basqarmasynyń ókili Anton Karlson, Serbııa Statıstıka basqarmasynyń ókilderi Mıra Nıkıch pen Nıkola Orlık, sondaı-aq táýelsiz sarapshy Stıv Veıl endi.
Astanada ótetin úsh kúndik jumys barysynda sarapshylar statıstıkalyq óndiristiń tıimdiligin, ashyqtyǵyn jáne tehnologııalyq deńgeıin aıqyndaıtyn negizgi halyqaralyq standarttar – GAMSO, GSBPM jáne GSIM modelderiniń engizilýine jan-jaqty taldaý júrgizedi.
Sholý aıasynda protsestik basqarý, qosalqy protsesterdi kartaǵa túsirý, metaderekterdi basqarý, tsıfrlyq transformatsııa, sapa kórsetkishteri júıesi, kadrlyq áleýet, jumys ýaqytyn esepke alý jáne quzyretterdi damytý máseleleri qarastyrylady.
Sondaı-aq Ulttyq statıstıka bıýrosynyń uıymdyq qurylymyn ózgertý jónindegi jol kartasy, resmı statıstıkany óndirýdiń tolyqtaı protsestik modeline kóshý boıynsha Islandııa men Serbııanyń úzdik tájirıbeleri talqylanady.
Budan bólek, Bıýro qyzmetkerleriniń keń aýqymy úshin ashyq pikirtalastar, halyqaralyq tájirıbelerdiń tanystyrylymdary, ıntegratsııanyń kelesi qadamdary boıynsha mıǵa shabýyl sessııalary, sondaı-aq GAMSO jáne GSBPM modelderiniń metaderekterge negizdelgen ortalyqtandyrylǵan óndiris pen zamanaýı IT-sheshimdermen ózara baılanysy jónindegi talqylaýlar josparlanǵan.
– Ulttyq statıstıka bıýrosy statıstıka júıesin jańǵyrtý, halyqaralyq standarttardy engizý jáne tsıfrlyq transformatsııany júzege asyrý baǵytynda júıeli jumys júrgizip keledi. Aldaǵy talqylaýlar biz úshin qol jetkizilgen nátıjelerge táýelsiz kásibı baǵa alý, ózekti syn-qaterlerdi talqylaý jáne odan ári damýdyń perspektıvaly baǵyttaryn aıqyndaý turǵysynan erekshe mańyzdy. Sholý qorytyndysy boıynsha BUU EEK táýelsiz kásibı usynymdary ázirlenip, olar Qazaqstannyń statıstıka júıesin odan ári reformalaýdyń negizine aınalady, - dedi Ulttyq statıstıka bıýrosynyń basshysy Maqsat Turlybaev.
Bıýro bul sholýdy tsıfrlyq transformatsııany jedeldetý, derekterdi basqarý sapasyn arttyrý jáne Qazaqstannyń jahandyq statıstıkalyq ekojúıedegi jaýapty qatysýshy retindegi halyqaralyq bedelin nyǵaıtý úshin biregeı múmkindik retinde qarastyrady.
Buǵan deıin habarlaǵanymyzdaı, Qazaqstan statıstıkamen jumys isteýge arnalǵan AI-kómekshini iske qosty.
