BUU Somalıge qoldaý kórsetý úshin 1,6 mlrd dollarlyq gýmanıtarlyq josparyn iske qosty

ASTANA. KAZINFORM – BUU muqtaj bolǵan 5,2 mln somalılik azamatqa kómek kórsetý úshin 2024 jyly gýmanıtarlyq áreket etý josparyn iske qosty. Jospar muqtaj adamdarǵa kómek retinde 1,6 mlrd AQSh dollar kóleminde qarajat bólýdi qarastyrady. Bul týraly brıfıngte BUU Bas hatshysynyń resmı ókili Stefan Dıýjarrık málim etti, dep habarlaıdy Sınhýa aqparat agenttigi.

Onyń aıtýynsha, BUU jospardy seriktestermen, sondaı-aq Somalıdiń federaldy jáne jergilikti úkimetterimen birlesip ázirlegen.

«Ótken jyly Somalı kóptegen kúızelisterdi bastan ótkerdi, sonyń ishinde joıqyn qurǵaqshylyq, buryn-sońdy bolmaǵan jaýyn-shashyn men sý tasqyny jáne qonys aýdarǵan adamdardyń jańa tolqyny. Somalıdegi mıllıondaǵan adamdar ashtyq pen durys tamaqtanbaýdan zardap shegip otyr», — dedi S. Dıýjarrık. 

Onyń atap ótýinshe, BUU-nyń gýmanıtarlyq máselelerdi úılestirý basqarmasy el halqynyń tórtten bir bóligin quraıtyn 4 mln-nan astam adamnyń azyq-túlik tapshylyǵyna tap bolǵany týraly qatań eskertý jasaǵan.

«Dabyl qaǵarlyq statıstıka sondaı-aq 5 jasqa deıingi árbir bes balanyń ekeýi durys tamaqtanbaýdan zardap shegip otyrǵanyn kórsetti», — dedi Dıýjarrık.

Sonymen qatar, ol eldiń ishki kóshi-qon saldarynan aýyr jaǵdaıǵa tap bolǵanyn, shamamen 3,8 mln adam ártúrli daǵdarystar saldarynan el ishinde kóship júrgenin qosyp aıtty.

Onyń aıtýynsha, onsyz da aýyr gýmanıtarlyq jaǵdaıǵa qosa, eldiń kóptegen bólikterinde tez taralyp jatqan tyrysqaq indeti órshýde.