BUU Soltústik Koreıaǵa buryn-sońdy bolmaǵan sanktsııa jarııalady

ASTANA. QazAqparat - Qazaqstan Phenıannyń jaýapsyz saıasaty men ǵalamshardyń ıadrosyz bolashaǵyn qamtamasyz etý jónindegi ujymdyq kúsh-jigerge nuqsan keltiretin arandatýshylyq áreketterin jappaı aıyptaýdy qoldaıdy. Bul týraly Qazaqstan ókili BUU Qaýipsizdik Keńesiniń otyrysynda málimdedi, dep habarlaıdy «QazAqparat» HAA tilshisi.

«KHDR zymyrandyq jáne ıadrolyq baǵdarlamalar qateri barlyq múddeles taraptarǵa kelissózder protsesin jańartý arqyly ózara qolaıly sheshimdi tabý boıynsha birlesken kúsh-jigerdi jandandyrý qajettigin týdyrýda. Qazaqstandyq dıplomatııanyń baǵamdaýynsha, bul máseleni kúshpen emes, dıalog arqyly ǵana sheshýge bolady», - delingen QR SІM baspasóz qyzmeti taratqan Qazaqstan málimdemesinde.

BUU Qaýipsizdik keńesi otyrysta KHDR Keńestiń barlyq qararlaryn buzatyn ıadrolyq baǵdarlamasyn júzege asyrýdy jalǵastyrýyna jaýap retinde biraýyzdan jańa qarar qabyldady.

2 371 qarar (2017) balııstıkalyq zymyran synaǵyna jaýap retinde qoldanylǵan sharalar ishindegi eń qatal sanktsııalardy qamtıdy. Bul sharalar Soltústik Koreıanyń negizgi eksportyna baǵyttalǵan jáne onda kómir eksportyna (Soltústik Koreıanyń syrtqy tabysynyń eń iri kózi), temir, temir keni, qorǵasyn, qorǵasyn keni jáne teńiz ónimderiniń eksportyna tolyǵymen tyıym salyndy. Odan bólek, atalǵan qarar BUU Qaýipsizdik keńesiniń buryn qabyldanǵan qararlaryn buzǵan KHDR jeke jáne zańdy tulǵalarynyń sanktsııalyq tizimin keńeıtedi.

Buryn-sońdy bolmaǵan mundaı sanktsııalyq sharalar Soltústik Koreıanyń ıadrolyq baǵdarlamasyn ári qaraı jalǵastyrýǵa arnalǵan qarjylyq múmkindikterdi shekteý maqsatynda onyń valıýtalyq kirisin (shamamen úshten birine deıin) qysqartýdy kózdeıdi.