BUU sırııalyqtarǵa gýmanıtarlyq kómek kórsetý úshin 10 mıllıard dollar jınaýdy josparlap otyr

BRıÝSSELЬ. QazAqparat – BUU Sırııanyń soǵystan zardap shekken turǵyndaryna gýmanıtarlyq kómek kórsetý úshin 10 mıllıard dollar jınaýǵa nıetti. Bul týraly seısenbi kúni BUU bas hatshysynyń gýmanıtarlyq máseleler jónindegi orynbasary Mark Loýkok Sırııa boıynsha halyqaralyq donorlyq konferentsııada sóılegen sózinde aıtty, dep habarlaıdy QazAqparat.

«Shyn máninde, qazirgi kezde Sırııa men onyń kórshiles elderindegi ahýal sońǵy toǵyz jyldaǵydan da nashar, birinshi kezekte soǵys qımyldarynyń ekonomıkalyq saldaryna baılanysty. Gýmanıtarlyq kómekke muqtaj adamdar sanynyń ósýi baıqalady. Sondyqtan bizde BUU-men yntymaqtasqan uıymdardyń qoldaýymen ázirlengen eń aýqymdy is-qımyl jospary bar, onyń aıasynda biz 10 mlrd dollar jınamaqpyz. Onyń 4,2 mlrd dollaryn Sırııa ishindegi turǵyndarǵa kómektesý úshin, 5,8 mlrd dollaryn kórshiles elderge qashqan sırııalyqtarǵa jınaýǵa tyrysamyz»,- dedi ol.

Brıýsselde Sırııa boıynsha kezekti halyqaralyq donorlyq konferentsııa ótip jatyr. 9 naýryzda EO dıplomatııasynyń basshysy Jozep Borrel: «Eýroodaq saıası retteý, jańa konstıtýtsııa qabyldaý jáne BUU qamqorlyǵymen erkin saılaý ótkizý jaǵdaıynda ǵana Sırııaǵa qoldaý kórsetedi» dep málimdedi. Onyń aıtýynsha, «saıası ózgeris bastalmaıynsha Damaskpen qarym-qatynasty qalypqa keltirý, sanktsııalardyń kúshin joıý jáne qalpyna keltirýge kómek bolmaıdy».