BUU Sırııada hımııalyq qarýdyń paıdalanylýy múmkindigin tekserip jatyr
Olardyń maqsaty - «úkimet nemese kóterilisshiler tarapynan zarın gazy paıdalanyldy ma?» degen saýalǵa jaýap berý.
Batys elderiniń úkimetteri zarın gazy Bashar Asad áskeri tarapynan qoldanyldy degendi alǵa tartýda. VVS-diń jazýynsha, sarapshylar hımııalyq qarý paıdalanylýy múmkin úsh óńirdi teksermek.
Budan buryn habarlanǵandaı, BUU sırııalyq shıelenis kezinde hımııalyq qarýdyń qoldanylýy múmkindigin tekserý úshin Sırııa úkimetimen kelisimge kele aldy. Bul týraly 14 tamyz kúni jarııalanǵan BUU bas hatshysy Pan Gı Mýnnyń málimdemesinde aıtyldy.
Kelisimniń sharttaryna sáıkes, ınspektorlar taraptardyń ózara kelisimimen merzimdi uzartý múmkindigimen elde 14 kún bola alady.
Bastapqyda Sırııa úkimeti halyqaralyq komıssııaǵa Han al-Asaldaǵy jaǵdaıdy tekserýdi usyndy. Sırııalyq úkimettiń málimdeýinshe, onda kóterilisshiler zarındi qoldandy. Degenmen, BUU tekserýdi ózge de aımaqtarda júrgizýdi talap etti.
Sırııa úkimeti jáne olarǵa qarsy turýshy kóterilisshiler hımııalyq qarýdy paıdalanýǵa qatysty ózara aıyptaýlarmen birneshe márte almasqan bolatyn.
