BUU: Sırııa qalpyna kelý úshin ondaǵan jyl kerek
ASTANA. 22 sáýir. QazAqparat - Sırııa bılik pen oppozıtsııa arasyndaǵy qarýly qaqtyǵys pen qanquıly janjaldyń zalaly men zardabyn ondaǵan jyl tartatyn bolady.
BUU-nyń gýmanıtarlyq máselelerdi úılestirý jónindegi basqarma ókili Djon Gıng aımaqtardy aralap kelgennen keıin jýrnalısterge osyndaı málimdeme jasady, dep jazady muslim.kz.
«Sırııany qalpyna keltirý úshin ondaǵan jyl ketedi. Tank jáne artıllerııa sekildi áskerı aýyr tehnıkamen júrgizilgen urystan turǵyn úıler men qala aýdandary úıindige aınalǵan. Turǵyn úıler jamap-jasqaýǵa, jóndeýge kelmeıtindeı bolyp, qırap, búlingen. Olardy súrip tastap, jańasyn salý kerek», - dedi ol.
Onyń aıtýynsha, ınfraqurylymnan túk qalmaǵan: zaýyttar men keńseler talan-tarajǵa túsip, bilim oshaqtary men aýrýhanalar jumys istemeıdi. 2011 jyly bılikke qarsy qozǵalys paıda bolǵan Deraa qalasyndaǵy jaǵdaı men eldegi azamattyq soǵysqa deıin Sırııanyń ekonomıkalyq astanasy sanalatyn Aleppo shaharyndaǵy jaǵdaı múldem syn kótermeıdi.
Aleppo ekige bólingen dese de bolady: bılik qaramaǵyndaǵy bóliginde dúken sórelerinen asa qajetti zattardy tabýǵa bolady ári kúnine birneshe saǵatqa elektr qýaty beriledi. Al ózge aýdandar gýmanıtarlyq apattyń aldynda tur. «Onda telefon, qalta telefony baılanysy úzilgen. Sý tek birneshe kúnnen keıin ǵana beriledi», - dedi ol sózin tolyqtyryp.
