BUU shtab-páterinde Naýryz meıramy toılandy
ASTANA. KAZINFORM — Birikken Ulttar Uıymynyń shtab-páterinde Naýryz Meıramyn atap ótýge arnalǵan resmı is-shara ótti. Іs-sharany Ortalyq Azııa memleketteriniń BUU janyndaǵy Turaqty ókildikteri uıymdastyrdy, dep habarlaıdy SІM baspasóz qyzmeti.
Qazaqstan Respýblıkasynyń BUU janyndaǵy Turaqty ókili Qaırat Omarov óz sózinde Naýryzdyń óńir elderiniń mádenı murasynyń ajyramas bóligi ekenin atap ótip, onyń jańarý, tatý kórshilik jáne birlik qundylyqtaryn beıneleıtinin jetkizdi. Qazirgi jahandyq syn-qaterler jaǵdaıynda bul merekeniń mańyzy arta túsip, dıalogty, ózara túsinistikti jáne halyqaralyq yntymaqtastyqty nyǵaıtýǵa yqpal etetini atalyp ótti.
Sonymen qatar, ol aǵymdaǵy jylǵy 15 naýryzda Qazaqstanda ótken respýblıkalyq referendýmǵa toqtalyp, onyń eldiń saıası jańǵyrýǵa jáne demokratııalyq ınstıtýttardy nyǵaıtýǵa beıildiligin aıqyndaıtyn mańyzdy kezeń bolǵanyn aıtty. Atalǵan referendým, Naýryz meıramy sekildi, jańarý, ilgerileý jáne neǵurlym ádiletti ári ınklıýzıvti qoǵam qurýǵa umtylystyń sımvoly ekeni atap ótildi.
Іs-sharanyń mádenı baǵdarlamasy aıasynda elimiz «Álqıssa» balalar folklorlyq ansambliniń «Altyn adam» atty mýzykalyq-teatrlandyrylǵan qoıylymymen tanystyryldy.
Budan bólek, Ortalyq Azııa memleketteriniń mádenıeti men ulttyq murasyn keńinen tanystyrǵan kórme uıymdastyrylyp, onda ulttyq qolóner buıymdary men dástúrli mýzykalyq aspaptar usynyldy.
Osydan buryn elordada ózge etnos ókilderi Naýryz merekesin toılaǵanyn jazdyq.