BUU sheshimimen 2010 jyl halyqaralyq bıoalýandyq jyly bolyp jarııalandy
ALMATY. Naýryzdyń 3-i. QazAqparat /Erbol Azanbek/ - Bıylǵy jyl BUU sheshimimen halyqaralyq bıoalýandyq jyly bolyp jarııalandy. Osyǵan oraı búgin Almatyda tabıǵat qorǵaý uıymdary baspasóz máslıhatyn ótkizip, halyqty tabıǵatty qorǵaýǵa basa nazar aýdarýǵa shaqyrdy,
dep habarlaıdy QazAqparat.
Tabıǵat qorǵaý uıymdarynyń ókilderi tabıǵatqa kóńil aýdarýdy kóktemde alǵash qyltııatyn gúlderdi qorǵaýdan bastaýǵa shaqyrdy. «Qazir álem bolyp tabıǵat qorǵaýdy basty nazarda ustap otyr. Sondyqtan bıyl BUU-nyń 61-shi sessııasy barysynda bıyl bıoalýandyq jyly bolyp jarııalandy. Bundaǵy basty maqsat-álem nazaryn bıoalýandyqty saqtaýǵa shaqyrý, tabıǵatty qorǵaýǵa nazar aýdarý, erekshe qorǵalatyn aýmaqtar sanyn ulǵaıtý» deıdi BUU Damý baǵdarlamasynyń Qazaqstandaǵy ulttyq menedjeri Quralaı Káribaeva.
Onyń aıtýynsha, búginde Qazaqstannyń 8,2 paıyzy erekshe qorǵalatyn aımaqqa jatady. Al álemdik qalyp boıynsha memleket aýmaǵynyń 10-12 paıyzy erekshe qorǵaýǵa alynýy tıis. Bul baǵytta Qostanaı oblysynda «Altyn dala», Aqmola men Qaraǵandy oblysynda «Buırataý», Shyǵys-Qazaqstan oblysynda Tarbaǵataı ulttyq tabıǵı parki, Jetisý óńirinde Jońǵar Alataý ulttyq tabıǵı parkin qurý jumystary júrgizilýde. Al qazirgi kezde 10 ulttyq qoryq, 10 ulttyq tabıǵı park, 3 tabıǵı rezervat, 50 memlekettik tabıǵı zakaznık jumys isteıdi.
