BUU sarapshysy: Qazaqstannyń elektrondyq úkimetin barlyq memleketterge úlgi etýge bolady

NUR-SULTAN. QazAqparat - Halyqaralyq sarapshy, BUU elektrondyq úkimet basqarmasynyń basshysy Akýaro Vınchenso «Azamattarǵa arnalǵan úkimet» memlekettik korporatsııasynyń promoHQO-sy men ahýaldyq ortalyǵyna kelý barysynda memlekettik korporatsııanyń qyzmetine joǵary baǵa berip, Qazaqstannyń memlekettik qyzmet kórsetý modelin basqa elderge de paıdalanýǵa bolatynyn atap ótti, dep habarlaıdy QazAqparat.

«Tsıfrlyq úkimetterińiz – maqtanarlyq dúnıe, jumystaryńyzdy barlyǵyna úlgi etýge bolady, tipti ózge elder úshin Qazaqstanda tsıfrlyq saıasattyń qalaı jasalyp jatqany jáne qyzmetterdiń qalaı usynylatyny jaıly týrlar uıymdastyrýǵa bolady. Tsıfrlyq qyzmetterdiń damýy týraly aıta kele, Qazaqstan – bolashaǵy zor el dep aıta alamyn», – dedi halyqaralyq sarapshy.

Akýaro Vınchenso, sondaı-aq Qazaqstan e-úkimet reıtıngisinde joǵary pozıtsııaǵa ıe bolǵanyn jáne tsıfrlyq úkimet pen ınnovatsııalar boıynsha álemdegi kóshbasshylardyń biri bolýǵa laıyq ekenin aıtyp ótti.

Meımanǵa memlekettik qyzmetterdi HQO jáne onyń onlaın balamasy – egov.kz portaly arqyly qalaı alýǵa bolatyny týraly aıtylyp qana qoımaı, memlekettik korporatsııanyń ahýaldyq ortalyǵynda Qazaqstannyń 350 front-ofısiniń jumysy qalaı baqylatyny da kórsetildi.