BUU sarapshysy: Qazaqstanda Sý resýrstarynyń ulttyq aqparattyq júıesin engizý - durys sheshim
ASTANA. KAZINFORM - BUU Damý baǵdarlamasynyń sý resýrstaryn basqarý jónindegi halyqaralyq keńesshisi Hıýbert Lor Qazaqstanda Sý resýrstarynyń ulttyq aqparattyq júıesin (SRUAJ) engizý durys qadam ekenin atap ótti, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.
Sarapshynyń pikirinshe, bul júıe sý resýrstaryna qatysty derekterdi júıeleýge jáne naqty mindetterdi tıimdi túrde sheshýge múmkindik beredi.
-Bul – qolda bar barlyq derek retsiz júkteletin jaı ǵana aýqymdy júıe emes. Júıe birneshe modýlden turady, olardyń árqaısysy ózine tán, jeke mindetti oryndaıdy. Bul naqty ári qajetti derekterge nazar aýdarýǵa múmkindik beredi. Barlyq modýl ózara baılanysty, biraq kezdeısoq emes, kerisinshe basqa modýlderge qajet aqparatty usyný maqsatynda biriktirilgen. Bul – SRUAJ-dyń basty artyqshylyqtarynyń biri. Osylaısha, barlyq modýl birige otyryp tutas júıe qalyptastyrady jáne sý resýrstaryn basqarýǵa baılanysty vızýalızatsııalaý men analıtıkalyq jumystardy qamtamasyz etedi, – dedi BUU Damý baǵdarlamasynyń sý resýrstaryn basqarý jónindegi halyqaralyq keńesshisi.
Eske sala keteıik, Memleket basshysynyń tapsyrmasy boıynsha Sý resýrstary jáne ırrıgatsııa mınıstrligi Sý resýrstarynyń ulttyq aqparattyq júıesin ázirledi. Bul júıede jerústi jáne jerasty sýyna qatysty barlyq málimet jınaqtalady. SRUAJ-dy ónerkásiptik paıdalanýǵa engizý 2026 jyldyń ekinshi jartysyna josparlanǵan.
Osyǵan deıin sý resýrstary salasynda ÚEU-men yntymaqtastyqty damytýǵa arnalǵan jańa keńes qurylǵany týraly jazdyq.