BUU Reseı-AQSh arasyndaǵy dıalogty quptaıdy jáne Ýkraınada beıbitshilik ornaýyna járdemdesýge daıyn

ASTANA. KAZINFORM – BUU Alıaskadaǵy sammıttiń qorytyndylaryn nazarǵa aldy jáne konstrýktıvti dıalogtyń jalǵasýyn quptaıdy. Bul týraly BUU Bas hatshysynyń resmı ókili Stefan Dıýjarrık TASS agenttigine bergen túsiniktemesinde aıtty. 

– Juma kúni Alıaskada AQSh pen Reseı prezıdentiniń arasynda ótken kezdesýdiń qorytyndysyn nazarǵa aldyq. Biz BUU-ǵa múshe memleketter arasyndaǵy syndarly dıalogtyń jalǵasýyn quptaımyz, - delingen mátinde. 

Halyqaralyq uıym Bas hatshysynyń resmı ókili Stefan Dıýjarrık BUU Ýkraınada turaqty beıbitshilikke qol jetkizýge baǵyttalǵan kez kelgen mańyzdy áreketti qoldaýǵa daıyn ekenin málimdedi.

– Bas hatshy (Antonıý Gýterrısh) Ýkraınada ádiletti, jan-jaqty jáne turaqty beıbitshilikke qol jetkizý jolyndaǵy alǵashqy qadam retinde atysty dereý, tolyq jáne sózsiz toqtatýǵa taǵy shaqyrady. Mundaı beıbitshilik Ýkraına egemendigine, táýelsizdigine jáne onyń halyqaralyq deńgeıde tanylǵan shekaralary aıasyndaǵy aýmaqtyq tutastyǵyna tolyq qurmet kórsetýge tıis. Bul BUU Jarǵysyna, halyqaralyq quqyqqa jáne BUU-nyń tıisti qararlaryna sáıkes júzege asyrylýy kerek. BUU osy baǵyttaǵy barlyq mańyzdy bastamany qoldaýǵa daıyn, - delingen onyń túsiniktemesinde.

Buǵan deıin úsh saǵatqa jýyq ýaqyt kelissóz júrgizgen Tramp pen Pýtın kelisimge kele almaǵanyn jazǵan edik. 

Atalǵan kezdesýdi saıasattanýshy Qazbek Maıgeldınov Pýtın-Tramp kezdesýi halyqaralyq shıelenisti azaıtý jolyndaǵy dıplomatııalyq qadam dep baǵalaǵan bolatyn.