BUU otandyq ınklıýzıvti jobany joǵary baǵalady

ASTANA. KAZINFORM — Qazaqstandyq mamandar ázirlegen erekshe qajettiligi bar balalarǵa arnalǵan tsıfrlyq sheshim halyqaralyq deńgeıde moıyndaldy. Otandyq startap BUU Balalar qorynyń «Digital Public Goods» (Tsıfrlyq qoǵamdyq ıgilikter) tizilimine engen elimizdegi alǵashqy joba boldy. 

Pandemııa kezeńinde bastalǵan bul áleýmettik bastama búginde jasandy ıntellekt múmkindikterin paıdalanatyn keshendi júıege aınaldy.

Joba avtorlarynyń aıtýynsha, baǵdarlamalyq ónimniń ashyq bastapqy kodqa (open-source) aýystyrylýy ony álemniń kez kelgen elinde ınklıýzııany damytý úshin qoldanýǵa múmkindik beredi.

— Qazirgi tańda tehnologııalar damyp jatyr. Biz tek mobıldi qosymshamen shektelmeı, jasandy ıntellekt dáýirine qadam bastyq. Basty maqsat — erekshe balalardyń damý erekshelikteri týraly aýqymdy derekter jıyntyǵyn qalyptastyrý. Bul erteńgi kúni muǵalimder men mamandarǵa balanyń qajettiligin dál anyqtap, jeke damý josparyn saýatty qurýǵa kómektesedi, — deıdi joba úılestirýshileri Ásem Tájıeva.

Bul bastama Nazarbayev University janyndaǵy NU Impact Foundation tarapynan qoldaý taýyp, tórt jyl ishinde ózin-ózi aqtaıtyn deńgeıge jetken. Sarapshylardyń pikirinshe, mundaı jobalar erekshe balasy bar otbasylardyń áleýmettik oqshaýlanýyna jol bermeıdi.

Aıta keteıik, buǵan deıin ınklıýzıvti bilim berý júıesin damytýda qandaı kedergiler baryn jazǵan edik.