BUU Ormýz buǵazy arqyly jetkizýdi qamtamasyz etý úshin jumys tobyn qurady
ASTANA. KAZINFORM – Birikken Ulttar Uıymy Taıaý Shyǵystaǵy jaǵdaıǵa baılanysty jahandyq azyq-túlik daǵdarysynyń aldyn alýǵa baǵyttalǵan jańa tetik qurdy, dep habarlaıdy BUU Jańadyqtary.
Taıaý Shyǵystaǵy shıelenistiń kúsheıýi aıasynda BUU Bas hatshysy Antonıý Gýterrısh jahandyq azyq-túlik daǵdarysynyń aldyn alý jáne tyńaıtqyshtarmen teńiz saýdasyn qoldaý maqsatynda arnaıy mehanızm qurýdy bastady. Bul týraly búgin BUU baspasóz qyzmeti habarlady.
Taıaý Shyǵysta jalǵasyp jatqan qaqtyǵys jáne onyń keńeıý qaýpi jahandyq logıstıkany buzyp otyr. Ormýz buǵazyndaǵy keme qatynasynyń irkilisi aldaǵy aılarda gýmanıtarlyq jaǵdaı men aýyl sharýashylyǵy óndirisine tikeleı áser etetin «domıno áserin» týyndatýy múmkin ekeni BUU málimdemesinde aıtyldy.
Maqsatty top: quramy men mindetteri
Atalǵan máselelerge jedel áreket etý úshin Antonıý Gýterrısh arnaıy maqsatty top qurdy. Bul qurylymdy BUU Bas hatshysynyń orynbasary jáne BUU Jobalyq qyzmetter jónindegi basqarmasynyń atqarýshy dırektory Jorje Moreıra da Sılva basqarady.
Top quramyna birqatar halyqaralyq uıym da engizildi: BUU Saýda jáne damý jónindegi konferentsııasy, Halyqaralyq teńiz uıymy jáne Halyqaralyq saýda palatasy.
Uıymdastyrý tobynyń negizgi basymdyǵy — Ormýz buǵazy aımaǵyndaǵy gýmanıtarlyq máselelerdi sheshýge baǵyttalǵan tehnıkalyq tetikter ázirleý. Qajet bolǵan jaǵdaıda qosymsha saraptamalyq uıymdar da tartylmaq.
BUU bul bastama burynǵy tájirıbege, atap aıtqanda Iemen boıynsha BUU-nyń tekserý jáne monıtorıng tetigine, Qara teńiz astyq bastamasyna jáne Gazaǵa gýmanıtarlyq kómek jetkizý jónindegi 2720 mehanızmine negizdelgenin atap ótti.
Dıplomatııalyq kúsh-jiger
Toptyń negizgi maqsaty — tyńaıtqyshtar men olardyń óndirisine qajetti shıkizattyń úzdiksiz saýdasyn qamtamasyz etý. BUU bul mehanızm múshe memlekettermen tyǵyz yntymaqtastyqta, olardyń ulttyq egemendigin tolyq saqtaı otyryp jáne halyqaralyq quqyq aıasynda iske asatynyn málimdedi.
Bas hatshy bul bastamanyń uzaq merzimdi jáne keshendi sheshim izdeýge baǵyttalǵanyn rastady, biraq jaǵdaıdy jumsartý úshin dereý áreket etý qajet ekenin de atap ótti.
— Eger bul bastama sátti bolsa, ol dıplomatııalyq úderis aıasynda elder arasyndaǵy senimdi nyǵaıtyp, keń aýqymdy saıası retteýge mańyzdy qadam bolar edi, — delingen málimdemede.
Sonymen qatar, maqsatty toptyń tehnıkalyq jumysymen qatar saıası deńgeıdegi ózara is-qımyldy BUU Bas hatshysynyń Taıaý Shyǵys qaqtyǵysy jónindegi jańadan taǵaıyndalǵan jeke ókili Jan Arno úılestiretin bolady.
Aıta ketelik Starmer men Tramp Ormýz buǵazyn ashýdyń mańyzdylyǵyn moıyndaǵan edi.
