BUU: Ormýz buǵazymen ótetin gýmanıtarlyq júkter qaýipsiz jetkizilýge tıis

ASTANA. KAZINFORM – BUU Bas hatshysynyń gýmanıtarlyq máseleler jónindegi orynbasary jáne tótenshe kómek úılestirýshisi Tom Fletcher Ormýz buǵazy arqyly gýmanıtarlyq júkterdiń qaýipsiz ótýin qamtamasyz etýge shaqyrdy. Ol bul mańyzdy teńiz jolyndaǵy úzilister halyqaralyq gýmanıtarlyq kómek operatsııalaryn aıtarlyqtaı qıyndatýy múmkin ekenin eskertti, dep habarlaıdy Reuters agenttigi.

— Gýmanıtarlyq kómek isinde irkilis kóp, ilgerileý joq. Baǵyttar jabylyp, shyǵyn artqan kezde, kómek kólemi sózsiz qysqarady jáne osynyń saldarynan eń aldymen oǵan eń qatty muqtaj adamdar zardap shegedi, — delingen Tom Fletcher málimdemesinde.

— Sondyqtan meniń qaqtyǵys taraptaryna jáne olarǵa yqpal ete alatyndardyń barlyǵyna úndeýim qarapaıym: gýmanıtarlyq júkter Ormýz buǵazy arqyly esh kedergisiz ári qaýipsiz ótýi tıis, — dep atap ótti ol.

Fletcher qaqtyǵystyń shegi Taıaý Shyǵys aımaǵynan áldeqaıda asyp túsip, álemdik naryqtarǵa, teńiz tasymalyna jáne azyq-túlik baǵasyna áser etip jatqanyn aıtty.

— Bul adamdardy qutqarý jónindegi jumysymyzǵa orasan zor kesirin tıgizedi. Mıllıondaǵan adamnyń jaǵdaıy qaýipke tigilip tur, — dedi ol. 

Janarmaı baǵasynyń kúrt ósýi qazirdiń ózinde búkil álem boıynsha teńiz tasymaly qunynyń qymbattaýyna ákeldi. Sonymen qatar áýe qatynasy men teńiz qatynasyndaǵy irkilister gýmanıtarlyq qyzmetkerlerdiń qozǵalysyn jáne júkterdiń jetkizilýin baıaýlatyp jatyr. Sonyń saldarynan ómirlik mańyzdy resýrstardy jetkizý alty aıǵa deıin keshigýi múmkin.

United Nations dereginshe, Tegeran is júzinde strategııalyq mańyzy bar Ormýz buǵazyn 1 naýryzdan bastap japqan.

Aıta keteıik, Ormýz buǵazyndaǵy júk tasymaly 90%-ǵa tómendegeni belgili boldy. Al buǵazdyń jabylýynan munaı naryǵyn ne kútip turǵanyn myna jerden oqı alasyz.