BUU: Ońtústik Sýdanda shamamen 9,3 mıllıon adam gýmanıtarlyq kómekke muqtaj
ASTANA. KAZINFORM — Ońtústik Sýdan álemdegi eń aýyr gýmanıtarlyq daǵdarystardyń birin bastan ótkerip otyr. BUU derekterine sáıkes, eldegi shamamen 9,3 mıllıon adam (bul shamamen halyqtyń 70 paıyzy) gýmanıtarlyq kómekke zárý. Bul týraly Anadoly agenttigi jazdy.
Bul derekti BUU-nyń Ońtústik Sýdandaǵy gýmanıtarlyq máseleler jónindegi úılestirýshisi Anıta Kıkı Gbeho málimdedi.
Onyń aıtýynsha, tabıǵı apat eldiń alty shtatynda aıtarlyqtaı zardap keltirgen. Uzaqqa sozylǵan qaqtyǵystar, azyq-túlik tapshylyǵy men qıraǵan ınfraqurylym qazirgi daǵdarysty odan ári kúrdelendirip otyr.
El ekonomıkasynyń negizgi bóligi munaı óndirýge negizdelgen, alaıda kópjyldyq soǵys saldarynan ınfraqurylymnyń buzylýy bul salany da aıtarlyqtaı kúıretken.
Qyrkúıek aıynan beri tolassyz jaýǵan nóser men sý tasqyny eldegi gýmanıtarlyq jaǵdaıdy qıyndatyp otyr. Sý basqan aımaqtarda kómek jetkizý qıyndap, halyqtyń turmys jaǵdaıy nasharlaǵan.
BUU málimetinshe, 23 qazanǵa deıin alty shtatta 960 600 adam sý tasqynynan zardap shekken, olardyń 92%-dan astamy Djongleı men ıÝnıtı shtattarynda turady.
Gbehonyń aıtýynsha, BUU men halyqaralyq uıymdar apattan zardap shekkenderge kómek kórsetýdi jalǵastyrady:
— Bıyl 3 mıllıonnan astam adamǵa azyq-túlik kómegi kórsetildi. Medıtsınalyq ortalyqtar men jedel kómek qyzmetteri halyqqa qoldaý kórsetip jatyr. Ońtústik Sýdan úkimeti men halyqaralyq qaýymdastyqtyń birlesken áreketteriniń arqasynda ótken jyly bastalǵan holera indeti baqylaýǵa alyndy. Ólim deńgeıi tómendep, jańa jaǵdaılardyń ósý qarqyny báseńdedi, — dedi ol.
Buǵan deıin Ońtústik Sýdandaǵy sý tasqynynan 335 myńǵa jýyq adam baspanasynan aıyrylǵanyn jazǵan edik.