BUU Ońtústik Sýdandaǵy jaýyngerlerdi gýmanıtarlyq kómekti urlady dep aıyptady
ASTANA. 16 qańtar. QazAqparat - BUU Bas hatshysy Pan Gı Mýn ońtústiksýdandyq áskerdi jáne kóterilisshilerdi elge jiberilgen gýmanıtarlyq kómekti urlady, dep aıyptady. Bul kómek negizinen azamattyq soǵys júrip jatqan eldiń qarapaıym halqyna arnalǵan.
Bul týraly atalmysh uıymnyń baspasóz qyzmetine silteme jasap, Reuters agenttigi habarlady.
Habarlamada Pan Gı Mýn azyq-túlik ónimderi jáne basqa da turmysqa qajetti zattar tıelgen avtokolonnalardy jaýyngerlerdiń ustap alyp qalýyna narazylyǵyn bildirdi. Onyń aıtýynsha, mundaı áreketter úkimet áskerleri tarapynan da, kóterilisshiler tarapynan da baıqalǵan.
Sondaı-aq, BUU bas hatshysy eldegi beıbit turǵyndar arasynda ólim-jitimniń kóbeıip bara jatqandyǵyn basa aıtty. Uıymnyń málimetteri boıynsha, tek 14 qańtar kúni Malkal aımaǵynda 200-den astam adam soǵys áreketteri júrip jatqan aımaqtan ketýge áreket jasap, Nil ózenine batyp ketken. Azamattyq soǵys saldarynan qazaǵa ushyraǵandardyń jalpy sanyn uıym myń adamnan kem emes dep sanaıdy. Al beıresmı túrde bul kıkiljińnen on myńnan astam adam qazaǵa ushyrady, dep málimdelgen.
